İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 554 Hüküm no: 603 Orijinal metin no: [171b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ali Çelebi b. Yusuf’un Üsküdarlı Mahmud Ağa Vakfı’na rehin bıraktığı evini borcunu ödeyerek teslim aldığı Mahmiye-i Galatasarayı’nda Beyoğlu mahallesinde sâkin olup Üsküdarlı Mahmud Ağa vakfına bi’l-fi‘l mütevellî olan Mahmud Çelebi b. Ahmed Efendi meclis-i şer‘-i şerîf-i enverde mahrûse-i Galata’ya tâbi‘ kasaba-i Kasımpaşa’da Kulaksız Ahmed mahallesinde sâkin bâ‘is-i hâze’l-kitâb es-Seyyid Ali Çelebi b. Yusuf mahzarında bi’t-tevliyye ikrâr ve takrîr-i kelâm edip mezbûr es-Seyyid Ali Çelebi bin yetmiş iki Şa‘bânı’nın altıncı günü zikr olunan Kulaksız Ahmed mahallesinde vâki‘ bir tarafdan Hüseyin Reis b. Abdullah mülkü ve bir tarafdan Emine Hâtun mülkü ve bir tarafdan Ali Kapudan mülkü ve bir tarafdan tarîk-i âm ile mahdûd büyût-ı adîdeyi müştemil mülk menzilini, iki yüz riyâlî guruşa bi tarîki’l-istiğlâl bana bey‘ ve teslîm ben dahi mâl-ı vakf-ı mezbûr ile ber vech-i muharrer ba‘de’l-iştirâ ve’l-kabûl semeni olan meblağ-ı mezbûr iki yüz otuz riyâlî guruşu mezbûr es-Seyyid Ali’ye teslîm ol dahi yedinden tamâmen ahz u kabz ettiğinden sonra menzil-i mahdûd-ı mezkûru gıbbe’t-tahliyyeti’ş-şer‘î ve’t-tekābuzi’l-mer‘î hîn-i akd-i mezkûrdan bir sene tamâmına değin mezbûr es-Seyyid Ali Çelebi’ye yirmi üç riyâlî guruşa îcâr ve teslîm ol dahi vech-i muharrer üzre istîcâr ve tesellüm edip menzil-i mezbûra bu âna gelinceye değin ber vech-i muharrer mutasarrıf olmuşdu. El-hâletü hâzihî hâlâ asl-ı mâl-ı vakıf olan meblağ-ı mezbûr iki yüz otuz guruş ile menzil-i mahdûd-ı mezkûrun bu âna değin mezbûr es-Seyyid Ali Çelebi zimmetinde müctemi‘ olan ücreteyni tevliyyetim hasebiyle mezbûr es-Seyyid Ali Çelebi yedinden tamâmen ahz u kabz eylediğimden sonra akd-i mezkûru fesh ve fekk-i rehin edip menzil-i mezbûru merkūm es-Seyyid Ali Çelebi’ye teslîm ol dahi tesellüm eyledi ba‘de’l-yevm meblağ-ı mezbûr iki yüz otuz guruşdan ve menzil-i mezbûrun [172a] ücretinden merkūm es-Seyyid Ali Çelebi zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Yahya Çelebi b. Mehmed, başkorucu İbrahim Beşe, el-Hâc Ali seroda, Muslu Odabaşı b. ( ), Mehmed Odabaşı b. Abdullah, çolak Mehmed b. ( ), İbrahim b. Ahmed ve gayruhüm mine’l-hâzırîn.