İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 553 Hüküm no: 602 Orijinal metin no: [171a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Ömer Efendi b. Şeyh Mustafa’nın kendisinden haksız yere aldığı para konusunda ehl-i örften Musa Ağa b. Malkoç ile sulh olduğu Mahmiye-i İstanbul’da Hocapaşa mahallesi sâkinlerinden Şeyh Ömer Efendi b. Şeyh Mustafa nâm kimesne meclis-i şer‘-i şerîfde bâ‘is-i hâze’l-kitâb Musa Ağa b. Malkoç nâm kimesne mahzarında ikrâr ve takrîr-i kelâm edip mezbûr Musa Ağa târih-i kitâbdan on üç sene mukaddem Cebeliye vâlisi olan Süleyman Paşa’nın mütesellimi iken fuzûlen bi gayri hakkın yüz otuz esedî guruşumu ve seksen beş esedî guruş kıymetli iki re’s katırımı ahz u kabz etmekle bundan akdem mezbûr Musa Ağa’dan da‘vâ ve taleb ettiğimde ol dahi inkâr etmekle beynimizde münâza‘ât-ı kesîre ve muhâsamât-ı şedîde vukū‘undan sonra muslihûn tavassut [171b] edip mezbûr Musa Ağa ile beynimizde elli esedî guruş üzerine inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr elli esedî guruşu yedinden tamâmen ahz u kabz ettiğimden sonra husûs-ı mezbûra müte‘allika âmme-i de‘âvîden mezbûr Musa Ağa’nın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Şeyh Mehmed Efendi b. Şeyh Abdülmuttalib, İbrahim Çelebi b. Ahmed, Abdülbâkī b. Muslu, el-Hâc Mustafa b. Tevekkül, Mustafa Beşe Serbölük-i birinci ve gayruhüm.