İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 556 Hüküm no: 606 Orijinal metin no: [172b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Mustafa’nın alacağının Ali Ağa b. Ahmed’in terekesinden ödenmesi Min hattıhî Mahmiye-i İstanbul’da Kumkapı dâhilinde Nişâncı Paşa-yı Atîk mahallesi sâkinlerinden bâ‘is-i hâze’l-kitâb Ahmed Çelebi b. Mustafa nâm kimesne meclis-i şer‘-i şerîfde mahmiye-i mezbûrede Lütfi Paşa mahallesi sâkinlerinden olup Dergâh-ı âlî yeniçerileri ocağı ağalarından iken maktûlen vefât eden Kör Ali Ağa b. Ahmed nâm kimesnenin sulbî sagīr oğlu Süleyman Ağa’nın tesviye-i umûruna kıbel-i şer‘den mansûb vasîsi olmağla müteveffâ-yı mezbûrun tereke-i vâfiyesine vâzı‘ü’l-yed olan Hasan Beşe b. Ahmed nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Ali Ağa hayâtında hazînedârı olan işbu hâzır bi’l-meclis Mehmed Beşe b. Abdullah nâm kimesne yediyle bi’l-irsâl benden iştirâ ve kabz ettiği beynimizde ma‘lûm boğası ve astar ve entari ve tülbent ve çintiyan bahâlarından zimmetinde bana iki yüz yirmi üç esedî guruş deyni olup hattâ şuhûd mahzarında ikrâr dahi ettiğinden sonra kable’l-edâ vefât edip zimmetinde bâkī kalmağla hâlâ vasiyy-i merkūm Hasan Beşe’ye suâl olunup meblağ-ı mezbûr müteveffâ-yı mezbûrun tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr, müdde‘î-i mezbûrdan müdde‘âsını mübeyyine beyyine taleb olundukda zikr olunan Nişâncı Paşa-yı Atîk mahallesi sâkinlerinden sandalcı Hasan b. el-Hâc Abdülkādir ve Derviş Ali mahallesi sâkinlerinden Mehmed Halîfe b. Hasan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Ağa hayâtında hazînedârı merkūm Mehmed Beşe yediyle bi’l-irsâl müdde‘î-i mezbûrdan iştirâ ve kabz eylediği beynlerinde ma‘lûm mârrü’z-zikr boğası ve astar ve entari ve tülbent ve çintiyan bahâlarından zimmetinde müdde‘î-i mezbûra vâcibü’l-edâ ve lâzımü’l-kazâ iki yüz yirmi üç esedî guruş deyni olduğunu ikrâr ve bizi işhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘-i şerîfden irsâl olunan Mevlânâ Mustafa Efendi b. Abdülaziz evvelâ zikr olunan Nişâncı Paşa-i Atîk mahallesine varıp ahâlîsinden Müezzin Mehmed Efendi b. Mustafa Efendi ve Odabaşı el-Hâc Muslu b. Mehmed ve Abdürrahim Çelebi b. Abdülkādir ve Attâr Ali Çelebi b. Abdünnebi ve İbrahim b. Abdullah ve Yusuf Beşe b. Abdullah ve Ramazan Beşe b. Abdullah ve Ahmed Çelebi b. Sinan ve el-Hâc Mehmed b. Hüseyin nâm kimesnelerden şâhid-i mezbûr Hasan’ın keyfiyyet-i hâlini suâl edip ve sâniyen zikr olunan Derviş Ali mahallesine varıp ahâlîsinden Müezzin Mehmed Halîfe b. Ahmed ve Mustafa Çelebi b. Zülfikār ve Müezzin Mahmud Çelebi b. Mehmed ve Ömer Çelebi b. Ahmed ve Mustafa b. Abdünnebi ve Mustafa? b. İlyas ve Abdi Çelebi b. Mustafa ve Süleyman Çelebi b. Ahmed nâm kimesnelerden şâhid-i mezbûr Mehmed Halîfe’nin keyfiyyet-i hâlini suâl eyledikde her biri şâhidân-ı mezbûrân için adl ve makbûlü’ş-şehâdedir deyû haber verdiklerini Mevlânâ-yı mezbûr mahallinde tahrîr ve ma‘an irsâl olunan Receb b. Osman ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olup müdde‘î-i mezbûr tahlîf-i şer‘î ile tahlîf olundukdan sonra mûcebince meblağ-ı mezbûr iki yüz yirmi üç guruşu müteveffâ-yı mezbûrun tereke-i vâfiyesinden müdde‘î-i mezbûr Ahmed Çelebi’ye edâ ve teslîme vasiyy-i merkūm Hasan Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Kemaleddin b. Müyesser, el-Hâc Hüseyin b. Üveys, el-Hâc Mehmed b. Ali, el-Hâc Kısım b. Receb Ali, Musa Halîfe b. Receb.