İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 557 Hüküm no: 607 Orijinal metin no: [173a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hamza Beşe’nin camiye vakfettiği nakitten kızı Hatice’ye borç verildiği Mahmiye-i İstanbul’da Kumkapı dâhilinde Nişâncı Paşa-yı Atîk mahallesinde sâkin iken bundan akdem vefât eden Hamza Beşe nâm kimesnenin sulbiye kebîre kızı olup zâtı ma‘rifet-i şer‘iyye ile ârifûn mahalle-i mezbûre sâkinlerinden Mehmed Ağa b. Himmet ve Ali Beşe b. Mustafa ve Hüseyin Beşe b. İsmail nâm kimesneler ta‘rîfleri ile mu‘arrefe olan Hatice nâm hâtun meclis-i şer‘-i şerîfde babası müteveffâ-yı mezbûr Hamza Beşe’nin mahalle-i mezbûrede vâki‘ câmi‘-i şerîfde eczâ-i şerîfe tilâveti için vakfı olan kırk bin akçeye mütevellî olan bâ‘is-i hâze’l-kitâb Mehmed Efendi b. Bayezid nâm kimesne tarafından husûs-ı âti’l-beyâna vekîl olduğu Mahmud Çelebi b. Kenan ve Ahmed Çelebi b. Abdülmennân nâm kimesneler şehâdetleri ile şer‘an sâbit olan Arabzâde Mehmed Efendi b. el-Hâc Ömer mahzarında ikrâr ve takrîr-i kelâm edip mütevellî-i mezbûr Mehmed Efendi babam müteveffâ-yı mezbûrun ber vech-i muharrer vakfı olan kırk bin akçeyi bana idâne ve teslîm ben dahi istidâne ve kabz eyledim. Min ba‘d meblağ-ı mezbûr zimmetimde vakf-ı mezbûra vâcibü’l-edâ ve lâzımü’l-kazâ deynimdir dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ali Efendi b. Veliyyüddin, sâbıkan çavuşbaşı Osman Ağa, Osman Ağa b. Mehmed, Hamza Efendi b. Ahmed, Mustafa Çelebi kâtib-i Vakf-ı Kılıç Ali Paşa, Şaban Ağa b. Receb ve gayruhüm.