İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 590 Hüküm no: 643 Orijinal metin no: [187b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Filibe’de ölen Filyos v. Şuyen’in Kestosder v. Kazar’da olan alacağı meselesinde kardeşi ve vârisi Sara ile sulh olduğu Mahmiye-i İstanbul’da Langa kurbunda Kâtib Kasım mahallesi sâkinlerinden olup bundan akdem medîne-i Filibe kurbunda hâlik olan Filyos v. Şuyen nâm zimmînin li ebeveyn kız karındaşı ve hasren vârisesi olan Sara nâm nasrâniyye zâtı ma‘rifet-i şer‘iyye ile ârifân Hasan Beşe b. Abdullah ve Ömer Çavuş b. Ebûbekir nâm kimesneler ta‘rîfleri [ile] mua‘rrefe oldukdan sonra meclis-i şer‘-i şerîfde tüccârdan olup mahmiye-i mezbûrede Kilid hanı’nda sâkin Belgradlı râfi‘-i hâze’l-kitâb Kestosder v. Kazar nâm zimmî muvâcehesinde ikrâr ve takrîr-i kelâm edip mûrisim hâlik-i mezbûr Filyos hayâtında medîne-i Edirne’de mezbûr Kestosder’e bi tarîki’l-emâne mecmû‘u üç yüz guruş kıymetli yüz dirhem bir sîm devâtını ve altmış miskāl incisini ve otuz miskāl su altınını def‘ ve teslîm ol dahi ahz u kabz edip kable’l-ahz hâlik olmağla irsen bana intikāletmiş idi deyû eşyâ-i mezbûreyi mezbûr Kestosder’den taleb ve da‘vâ eylediğimde, ol dahi inkâr ettiğinden mâ‘adâ hâlik-i mezbûr Filyos zimmetinde cihet-i karz-ı şer‘îden doksan beş guruş hakkım vardır deyû benden taleb ve da‘vâ edip ben dahi inkâr etmekle beynimizde münâza‘ât-ı kesîre vâkı‘a olmuşdu. El-hâletü hâzihî muslihûn tavassut edip mezbûr Kestosder ile beynimizde üç guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr üç guruşu mezbûr Kestosder’den ahz u kabz ettiğimden sonra zikr olunan devât ve inci ve altına müte‘allika âmme-i de‘âvâdan [de‘âvîden] mezbûr Kestosder’in zimmetini ibrâ ve iskāt edip ve mezbûr Kestosder dahi meblağ-ı mezbûr doksan beş guruşa müte‘allika de‘âvâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî selh-i şehri Rebî‘ilâhir li sene seb‘a ve semânîn ve elf. Şuhûdü’l-hâl: Halil Çavuş b. Ali, Hasan Beşe b. Abdullah, Ömer Çavuş b. Ebûbekir, İbrahim Çelebi b. Mehmed, Osman b. Ömer ve gayruhüm.