İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 589 Hüküm no: 642 Orijinal metin no: [187a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İran tüccarından Sakarya v. Maksud’un Mehmed Beşe b. Arslan’da alacağı olduğu Acem tâ’ifesinden işbu bâ‘isü’s-sifr Sakarya v. Maksud nâm zimmî meclis-i şer‘-i şerîfde Mehmed Beşe b. Arslan mahzarında üzerine da‘vâ ve takrîr-i kelâm edip mezbûr Mehmed Beşe zimmetinde bundan akdem yedimde iştirâ ve kabz eylediğimi beynimizde ma‘lûm Acem metâ‘ı semeninden yüz otuz guruş hakkım olup hattâ şuhûd mahzarında cihet-i mezbûreden bana deyni olduğunu ikrâr dahi ettiğinden sonra işbu temessükü yedime vaz‘ ve teslîm etmiş idi hâlâ mezbûr Mehmed Beşe’ye suâl olunup meblağ-ı mezbûr yüz otuz guruşu bana edâ ve teslîme tenbîh olunmak matlûbumdur dedikde gıbbe’s-suâl mezbûr Mehmed Beşe cevâbında müdde‘î-i mezbûr yedinden iştirâ ve kabz eylediğim beynimizde ma‘lûm Acem metâ‘ı semeninden ancak doksan guruş deynim olup ziyâde kırk guruş deynimdir deyû ber vech-i ikrârihî kâzib idim deyicek müdde‘î-i mezbûr merkūm Mehmed Beşe meblağ-ı mezbûr kırk guruş zikr olunan Acem metâ‘ı semeninden deyni olduğunu ikrârında kâzib olmayıp ve kendi dahi da‘vâsında mubtıl olmadığına yemîn teklîf olundukda ol dahi hasbe’l-mes’ûl yemîn billâhi’l-aliyyi’l-a‘lâ etmeğin mûcebince meblağ-ı mezbûr yüz otuz guruşu müdde‘î-i mezbûra edâya merkūm Mehmed Beşe’ye tenbîh birle, mâ vaka‘a bi’t-taleb ketb olundu. Fi’l-yevmi’s-sâdis min Cemâziyelevvel li sene seb‘a ve semânîn ve elf. Şuhûdü’l-hâl: Ebûbekir b. Hüseyin, İbrahim Çelebi b. Ahmed, Mehmed Çelebi b. Abdullah, Osman b. Ömer, Ali Çelebi b. Şaban, Bayram b. Abdullah, Veli b. Mahmud ve gayruhüm.