İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 591 Hüküm no: 645 Orijinal metin no: [187b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdi’nin nafaka ve mehir hususunda boşandığı kocası Murtaza b. Mustafa’nın zimmetini ibrâ ettiği Mahmiye-i İstanbul’da Kazzâz Ağa mahallesi sâkinelerinden Ayşe bt. Abdi nâm hâtun meclis-i şer‘-i şerîf-i hatîr-i lâzımü’t-tevkīrde zevc-i mutallıkı bâ‘is-i hâze’l-kitâb Murtaza b. Mustafa nâm kimesne mahzarında ikrâr ve takrîr-i kelâm edip târih-i kitâbdan iki gün mukaddem mezbûr Murtaza beni tatlîk edip zimmetinde mütekarrir ve ma‘kūdun-aleyh olan üç bin akçe mehr-i müeccelim ve nafaka-i iddet-i ma‘lûmem ve me’ûnet-i süknâm için dahi beynimizde ma‘lûm eşyâyı bana mezbûr Murtaza def‘ ve teslîm ben dahi ahz u kabz eylediğimden sonra meblağ-ı mezbûr üç bin akçeye ve nafaka-i iddet-i ma‘lûme ve me’ûnet-i süknâya ve hukūk-ı zevciyyete müte‘allika da‘vâdan ben mezbûr Murtaza’nın zimmetini ibrâ ve iskāt edip mezbûr Murtaza dahi hukūk-ı zevciyyete müte‘allika da‘vâdan benim zimmetimi ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde mezbûr Murtaza mukırra-i mezbûre Ayşe’yi cemî‘ kelimât-ı meşrûhasında şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn ve şehri Rebî‘ilâhir li sene seb‘a ve semânîn ve elf. Şuhûdü’s-sâbik[ūn].