İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 592 Hüküm no: 646 Orijinal metin no: [187b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Beşe b. Mustafa’nın Topkapı’nın Fâtıma Sultan mahallesindeki evini Ahmed Ağa b. Mustafa’ya sattığı Mahmiye-i İstanbul’da Topkapısı kurbunda Fâtıma Sultan mahallesinde sâkin Murad v. Matis nâm zimmî tarafından husûs-ı âti’l-beyâna vekîl olduğu Ahmed Ağa b. Mehmed ve diğer Ahmed Ağa b. Mehmed nâm kimesneler şehâdetleriyle şer‘an sâbite olan Ahmed Beşe b. Mustafa nâm kimesne meclis-i [188a] şer‘-i şerîfde bâ‘is-i hâze’l-kitâb fahrü’l-emâcid Ahmed Ağa b. Mustafa nâm kimesne mahzarında bi’l-vekâle ikrâr ve takrîr-i kelâm edip akd-i âtî sudûruna değin müvekkilim mezbûr Murad yedinde mülk ve hakkı olup mahalle-i mezbûrede vâki‘ bir tarafdan Kör Ali Ağa veresesi mülkleri ve bir tarafdan Sofu’nun zâviyesine mevkūf menzil ve iki tarafdan tarîk-i âm ile mahdûd dâhiliyyesinde iki bâb tahtânî oda ve bir matbah ve bi’r-i mâ ve kenîf ve bahçeyi ve hâriciyyesinde dört bâb fevkānî odalar ve ahır ve kenîf ve cüneyneyi müştemil mülk menzilini, bi cümleti’t-tevâbi‘ ve’l-levâhık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile beş yüz altmış esedî guruşa mezbûr Ahmed Ağa’ya bey‘ ve teslîm ol dahi ber vech-i muharrer iştirâ ve kabûl ve tesellüm eylediğinden sonra semeni olan meblağ-ı mezbûr beş yüz altmış esedî guruşu mezbûr Ahmed Ağa yedinden tamâmen ahz u kabz eyledi ba‘de’l-yevm menzil-i mahdûd-ı mezkûr merkūm Ahmed Ağa’nın mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Cemâziyelevvel li sene seb‘a ve semânîn ve elf. Şuhûdü’l-hâl: Mehmed Efendi b. Mehmed el-İmâm, Mehmed b. Mustafa el-Müezzin, Hüseyin b. Hasan, Hüseyin Beşe b. Ahmed, Mehmed b. Hüsnü, Ramazan b. Hüseyin Mehmed b. Mahmud, Hasan Çelebi el-Mütevellî, Hüseyin b. Mahmud ve gayruhüm.