İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 601 Hüküm no: 660 Orijinal metin no: [191a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahter v. Yuvan’ın Hacı Muhyiddin mahallesindeki evini Dimo v. Andriye’ya sattığı Mahmiye-i İstanbul’da el-Hâc Muhyiddin mahallesi sâkinlerinden Ahter v. Yuvan nâm zimmî meclis-i şer‘-i şerîfde bâ‘is-i hâze’s-sifr Dimo v. Andriye nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan âhar mülküm ve bir tarafdan Papas Trandafilo [nâm] zimmî mülkü ve ba‘zan Dimitri ve ba‘zan Dikici diğer Dimitri ve ba‘zan Simo nâm zimmîler mülkleri ve bir tarafdan Hüseyin Efendi vakfı olan oda kemer duvarı [191b] ve bir tarafdan tarîk-i âm ile mahdûd fevkānî üç bâb oda ve bir sofa ve bir tahtapûş ve bir kenîf ve bahçeyi müştemil menzilimi, cümle tevâbi‘ ve levâhıkı ve kâffe-i hukūk ve merâfıkı ile mezbûr Dimo’ya tarafeynden îcâb ve kabûlü hâviye şurût-ı müfsideden ârî bey‘-i bâtt-ı sahîh-i şer‘î ile üç yüz esedî guruşa bey‘ ve teslîm ol dahi iştirâ ve tesellüm ve kabz ettikden sonra semeni olan meblağ-ı mezbûr üç yüz esedî guruşu yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Dimo’nun mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min Cemâziyelevvel li sene seb‘a ve semânîn ve elf. Şuhûdü’l-hâl: Hasan Beşe b. Mehmed, İbrahim Çelebi b. Ahmed, Osman Çelebi b. Ömer, Ebûbekir b. Hüseyin, Mehmed b. Mehmed, Dimitri v. Tanaş, Manol v. Yamandi, Yamandi v. Yani, Seryano v. Nikola, Yorgi v. Ergili, Yorgi v. Dimo, Nikola v. Dimo, Papa Trandafilo v. Yorgi, Papa Asanaki v. Papa Yani gayruhüm.