İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 601 Hüküm no: 659 Orijinal metin no: [191a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın işçilik yaptığı Kastodoli ve Yorgaki v. Nikola’dan alacağı ücret konusunda anlaşma sağladığı Mahmiye-i Üsküdar’da Salacak kurbunda sâkin Ahmed b. Abdullah nâm kimesne meclis-i şer‘-i şerîfde Kastodoli ve Yorgaki v. Nikola nâm zimmîler muvâcehesinde ikrâr ve takrîr-i kelâm edip târih-i kitâbdan bir sene mukaddem mezbûrân Kastodoli ve Yorgaki’ye nefsimi bin dokuz yüz akçeye bir sene tamâmına değin hizmet etmek üzre îcâr edip anlar dahi istîcâr ve kabûl etmişlerdi hâlâ müddet-i madrûbe tamâm olmağla ücret-i mezkûremi taleb ve da‘vâ eylediğimde, mezbûrân Kostodoli ve Yorgaki vech-i muharrer üzre meblağ-ı mezbûre istîcârlarını münkirân olmaları ile beynimizde münâza‘ât-ı kesîre cereyân etmiş idi el-hâletü hâzihî vesâtat-ı muslihîn ile beni ücret-i mezkûreden mezbûrân Kostodoli [ve] Yorgaki ile dört yüz akçe üzerine esnâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr dört yüz akçeyi mezbûrân Kastodoli ve Yorgaki yedlerinden tamâmen ahz u kabz eylediğimden sonra husûs-ı mezbûra müte‘allik da‘vâdan mezbûr Kostodoli ve Yorgaki’nin zimmetlerini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Cemâziyelevvel li sene seb‘a ve semânîn ve elf. Şuhûdü’l-hâl: Mehmed Çelebi b. Ali, Mustafa b. Murtaza, Ahmed Çelebi b. Ali, İsmail Çelebi b. Mehmed, İbrahim Çelebi b. Ali ve gayruhüm.