İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 604 Hüküm no: 664 Orijinal metin no: [192a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Çavuş Vakfı’na mütevelliye olan Ayşe bt. Mustafa Ağa’nın kardeşi oğlu Mehmed Çelebi’yi vekil tayin ettiği Mahmiye-i İstanbul’da Hüseyin Ağa mahallesi sâkinelerinden olup medîne-i Hazret-i Ebâ Eyyûb-i Ensârî -aleyhi’r-rahmeti rabbihi’l-Bârî-de vâki‘ Kasım Çavuş vakfına meşrûtiyyet üzre bi’l-fi‘l mütevelliye olan Ayşe bt. Mustafa Ağa nâm hâtun tarafından vech-i âtî üzre tevkîle vekîl olduğu zâtını ma‘rifet-i şer‘iyye ile ârifân Ma[k]sud Bey b. Osman ve Abdullah b. Mustafa nâm kimesneler şehâdetleriyle şer‘an sâbite olan Mehmed Odabaşı b. Hüseyin kimesneler meclis-i şer‘-i şerîfde müvekkile-i mezbûrenin li ebeveyn er karındaşı oğlu Mehmed Çelebi b. Mehmed nâm kimesne mahzarında ikrâr ve takrîr-i kelâm edip müvekkilem mezbûre Ayşe Hâtun umûr-ı tevliyyet uhdesinden gelmeğe kādir ve müstakīm olmamağla tarafından umûr-ı tevliyyet-i mezkûreyi ikāmete ve hıdemât-ı lâzımesini edâya mezbûr Mehmed’i vekîl ve menâbına nâib nasb ve ta‘yîn edip ol dahi vekâlet-i mezbûreyi kabûl ve umûr-ı tevliyyet-i mezkûreyi ikāmete ve hıdemât-ı lâzımesini edâya müdâvemete ta‘ahhüd eylediğinde, gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene seb‘a ve semânîn ve elf. Şuhûdü’l-hâl: Kasım Çavuş mescidi imâmı Mehmed Efendi b. Mustafa Ağa, müezzin Mustafa Halîfe b. (…) Mehmed, Mustafa Beşe b. Abdullah, Ali Çelebi b. Osman, Hasan Beşe b. Osman, Dülgerzâde Mustafa Çelebi, Receb Beşe el-Attâr, ve gayruhüm.