İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 604 Hüküm no: 665 Orijinal metin no: [192b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Abdullah’ın Kâtib Mustafa mahallesindeki evini İbrahim Çelebi b. Hasan’a sattığı Mahmiye-i İstanbul’da Kâtib Mustafa mahallesi sâkinelerinden zâtı ma‘rifet-i şer‘iyye ile ârifân İmâm Ömer Efendi b. İsâ ve Abdülkerim Çelebi b. Mehmed nâm kimesneler ta‘rîfleriyle mu‘arrefe olan Fâtıma bt. Abdullah nâm hâtun meclis-i şer‘-i şerîf-i enverde bâ‘is-i hâze’l-kitâb İbrahim Çelebi b. Hasan nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Sâliha bt. Abdullah nâm hâtun menzili ve bir tarafdan Aynî bt. Abdullah nâm hâtun menzili ve bir tarafdan âhar mülk menzilim ve bir tarafdan tarîk-i âm ile mahdûd, iki bâb fevkānî ve bir bâb tahtânî odalar ve kenîf ve cüneyne ve havluyu müştemil menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâviye şurût-ı müfsideden ârî bey‘-i bâtt-ı sahîh-i şer‘î iki yüz esedî guruş merkūm İbrahim Çelebi’ye bey‘ ve teslîm ol dahi ber vech-i muharrer iştirâ ve tesellüm ve kabûl ettiğinden sonra semeni olan meblağ-ı mezbûr iki yüz esedî guruşu mezbûr İbrahim Çelebi bana edâ ve teslîm ben dahi yedinden tamâmen ahz u kabz eyledim ba‘de’l-yevm menzil-i mahdûd-ı mezbûr müşterî-i merkūm İbrahim Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î ve tahkīki’l-mer‘î mâ vaka‘a bi’t-taleb ketb olundu. Fi’l-yevmi’l-âşir min Cemâziyelevvel li sene seb‘a ve semânîn ve elf. Şuhûdü’l-hâl: Mustafa b. Ramazan, Mehmed Efendi el-İmâm b. Muharrem, Mehmed Halîfe el-Müezzin b. Abdullah, Ahmed Çelebi [b.] İbrahim, İsmail Çelebi b. Mehmed, İbrahim Çelebi b. Ahmed.