İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 607 Hüküm no: 668 Orijinal metin no: [193b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Paşa b. Kaptan Ali Paşa’nın kölesi Yuvan v. Rada’yı azat ettiği Mahmiye-i İstanbul’da hısnı ebvâbından Kapan-ı dakīk dâhilinde sâkin emîrü’l-ümerâ’i’l-kirâm kebîrü’l-küberâ’i’l-fihâm zü’l-kadri’r-râsih ve’ş-şerefi’ş-şâmih Mehmed Paşa b. el-merhûmü’l-mebrûr Kapudan Ali Paşa tarafından i‘tâk-ı âti’z-zikrin ikrâra vekîl olup Hüseyin Çelebi b. Abdülmennân ve Yusuf Ağa b. Abdurrahman nâm kimesneler şehâdetleri ile şer‘an vekâleti sâbite olan Ahmed Çelebi b. Abdullah nâm kimesne meclis-i şer‘-i şerîf-i enver ve mahfil-i dîn-i münîf-i ezherde, müvekkil-i müşârün-ileyhe rıkkını i‘tirâf eden uzun boylu açık kaşlı gök ala gözlü Hırvadiyyü’l-asl râfi‘-i hâze’r-rakīm Yuvan v. Rada nâm gulâm mahzarında bi’l-vekâle ikrâr-ı sahîh-i şer‘î ve i‘tirâf-ı mer‘î kılıp, müvekkile-i müşârün-ileyh Mehmed Paşa’nın ıtk-ı rakabât a‘zam-ı kurebât? ve sebeb-i ref‘-i derecât ve vesîle-i duhûl-i cennât-ı âliyât olduğuna ıttılâ‘ı olmağın babası merhûm müşârün-ileyhden irs-i şer‘le müstakillen ve hissesine isâbet eden abd-i memlûkü mevsûf-ı mezbûru, hasbeten lillâhi’l-meliki’l-Hallâk ve hasenete li rûhi resûlihi’l-mevsûf bi mekârimi’l-ahlâk malından tahrîr ve i‘tâk ve zîk-ı rıkkıyyetden ihrâc ve ıtlâk ve kazâ-yı hürriyete idrâc ve ilhâk eyledi ba‘de’l-yevm mevsûf-ı mezbûr sâir ahrâr-ı asliyyîn gibi hür olup üzerinde müvekkil-i müşârün-ileyhin hakkı bâkī kalmadı dedikde mâ hüve’l-vâki‘ bi’t-taleb ketb olundu. Fi’l-yevmi’l-âşir min Cemâziyelevvel li sene seb‘a ve semânîn ve elf. Şuhûdü’l-hâl: Mehmed Çelebi b. Cafutiye?, Hasan Çelebi b. Abdullah, Hasan b. Abdullah, Ali Çelebi b. Mehmed ve gayruhüm mine’l-hâzırîn.