İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 606 Hüküm no: 667 Orijinal metin no: [193a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eski Rum Patriği Diyonisyos’un Atmeydanı’ndaki Sultan Ahmed Medresesi’ne ait para vakfına borcu olduğu Min hattıhî Atmeydanı kurbunda vâkı‘a medrese-i celîle-i sultâniye mesâlihi için merhûm Mustafa Efendi’nin vakfı olan nukūda berât-ı pâdişâhî ile bi’l-fi‘l mütevellî olan bâ‘is-i hâze’l-kitâb Şaban Bey b. Süleyman nâm kimesne dîvân-ı kāimmakām-ı hazret-i sadr-ı a‘zamîde akd-i olunan meclis-i şer‘-i şerîfde hâlâ mahmiye-i İstanbul’da Rum patriği olan Bartinos nâm râhib ile Ereğli metrepolidi olan Vartalomyos v. Marti ve Kapıdağı metrepolidi Metrofan v. Dimitri ve İznikmid metrepolidi Tavakinos v. Mikail ve Kayseriye metrepolidi Argoryos v. Kalinos ve Kadıköy metrepolidi Eremya v. Kiricsi ve Amasya metrepolidi Yerasimos v. Kika ve Bursa metrepolidi Kalisnogos v. Diyez ve Midilli metrepolidi Argoryos v. Nikola ve Dimetoka metrepolidi Argoryos v. Françesko ve Kırım metrepolidi Todoyos v. Dimitri ve Ahyolu metrepolidi Danyal v. Petro ve Gördös metrepolidi Kalistos v. Kosta ve Terkos metrepolidi Makaryos v. Sidi ve Ilıca metrepolidi Teodos v. Andon ve İzmir metrepolidi Yadagon v. Yorgi ve Vidin metrepolidi Dimotoyoş v. Panayot nâm râhibler muvâcehelerinde takrîr-i kelâm ve ta‘bîr-i ani’l-merâm edip bin seksen dört senesi Muharremi gurresinde yedimde olan vakf-ı mezbûr malından iki bin esedî guruş mahmiye-i mezbûrede sâbıkan patrik olan Diyonisyos nâm râhibe idâne ve teslîm ol dahi istidâne ve tesellüm ettiğinden sonra meblağ-ı mezbûr iki bin guruş için beni mezbûr Bartinos üzerine havâle edip ol dahi kabûl ettiğinden sonra meblağ-ı mezbûr iki bin guruşa mezbûrûndan her bir tarafeynden emir ve kabûlü hâviye kefâlet ile kefîl olmuşlar idi hâlâ mezbûrûna suâl olunup takrîrleri tahrîr olunmak matlûbumdur dedikde gıbbe’s-suâl bi tarîk-i mezbûr Bartinos [cevâbında] kaziyye tafsîli mürûr eylediği vech üzre olup meblağ-ı mezbûr iki bin guruş için merkūm Diyonisyos mütevellî-i merkūm Şaban Bey’i kendi üzerine havâle ettikde kabûl ettiğini, hâlâ vakf-ı mezbûreye muharrer iki bin guruş esedî deyni olduğunu ikrâr ve i‘tirâf edip mezbûrûn Vartalomyos ve Metrofan ve Tavakinos ve Argoryos ve Eremya ve Yerasimos ve Kalisnogos ve Argoryos ve Todoyos ve Danyal ve Kalistos ve Makaryos ve Teodos ve Yadagon ve Dimotoyoş’dan her biri dahi meblağ-ı mezbûr iki bin guruşa tarafından emir ve kabûlü üzerine kefâlet ile kefîl olduğunu ikrâr ve i‘tirâf etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Rebî‘ilâhir li sene seb‘a ve semânîn ve elf. [193b] Şuhûdü’l-hâl: Umdetü erbâbü’t-tahrîr ve’l-kalem Hasan Efendi Tezkire-i ûlâ, kıdvetü ashâbü’t-tastîr ve’l-kalem Yusuf Efendi Tezkire-i ûlâ, Eyyûb Receb Çavuş b. Mustafa, Küçükpazarlı Osman Çavuş b. Ahmed, Mustafa Çavuş b. Derviş, kapıcılar kethüdâsı Ahmed Ağa b. ( ), Mustafa Efendi b. İbrahim, umdetü’l-emâsil ve’l-akrân çavuşbaşı Murad Ağa, Kıdvetü ashâbü’t-tastîr ve’r-rakam muhzır Kasım, el-Hâc Ali Çavuş b. Ali.