İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 608 Hüküm no: 670 Orijinal metin no: [194a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Abdullah’ın Mehmed Efendi b. Ahmed’den boşandıktan sonra zimmetini ibrâ ettiği Mahmiye-i İstanbul’da Çivizâde mahallesi sâkinelerinden Ümmühâni bt. Abdullah nâm hâtun tarafından husûs-ı âti’l-beyâna vekîl olup zâtı ma‘rifet-i şer‘iyye ile ârifân mahalle-i mezbûre sâkinlerinden Mustafa Çelebi b. Sefer ve diğer Mustafa Çelebi Dede b. Mehmed nâm kimesneler şehâdetleri ile şer‘an vekâleti sâbite olan Mehmed Efendi b. Ahmed nâm kimesne meclis-i şer‘-i hatîr-i lâzımü’t-teşrîfde, müvekkile-i mezbûrenin zevc-i mutallıkı bâ‘is-i hâze’l-kitâb Ahmed Çelebi b. Mehmed nâm kimesne mahzarında bi’l-vekâle ikrâr ve takrîr-i kelâm edip mezbûr Ahmed Çelebi zevcesi müvekkilem mezbûre Ümmühâni’yi üç def‘a talâk-ı bâyin ile tatlîk etmeğin zimmetinde mütekarrir ve ma‘kūdun-aleyh olan üç bin akçe olan mehr-i müeccelinin mezbûre Ümmühâni Hâtun bin üç yüz akçesini mezbûr Ahmed Çelebi yedinden ahz ve kab eylediğinden sonra bâkī bin yedi yüz akçesinden ve nafaka-i iddet-i ma‘lûme ve me’ûnet-i süknâsından ve deyn-i şer‘îden bir altın ve bir alaca ve beş gömlek da‘vâsından ve sâir hukūk-ı zevciyyete müte‘allika âmme-i de‘âvîden mezbûr Ahmed Çelebi’nin zimmetini ibrâ-i âmm-ı ve kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Cemâziyelevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Muharrem Beşe b. Mahmud, Ebûbekir Çelebi b. Hüseyin, Ali Beşe b. Şaban, Ramazan Dede b. Abdullah, Sefer Dede b. Ömer, Hüseyin Dede b. Abdullah, Mustafa Çelebi b. Mehmed, Mustafa Çelebi b. Ahmed.