İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 608 Hüküm no: 671 Orijinal metin no: [194a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abbas ile Hasan Beşe b. Abdullah’ın muhâla‘a yoluyla boşandıkları Mahmiye-i İstanbul’da Neslişah mahallesinde sâkine olup zâtı ma‘rifet-i şer‘iyye ile ârifân İmâm Mustafa Efendi b. Ali ve Sinan Beşe b. Ahmed nâm kimesneler ta‘rîfleri ile mu‘arrefe olan Sâliha bt. Abbas nâm hâtun meclis-i şer‘-i enverde zevc-i dâhili bâ‘is-i hâzihi’l-vesîka Hasan Beşe b. Abdullah mahzarında ikrâr ve takrîr-i kelâm edip zevcim mezbûr Hasan Beşe zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre Hasan Beşe ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettiğinden sonra hukūk-ı zevciyyete müte‘allik cemî‘ da‘vâdan her birimiz âharın zimmetini ibrâ-i âm ile kātı‘ü’n-nizâ‘la ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Cemâziyelevvel li sene seb‘a ve semânîn ve elf. Şuhûdü’l-hâl: Mustafa Efendi el-İmâm, Sinan Beşe b. Ahmed, Hamza Beşe b. Ömer, Mehmed b. Musa, Mustafa Beşe b. Musa ve gayruhüm mine’l-hâzırîn.