İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 620 Hüküm no: 686 Orijinal metin no: [198a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Hasan’ın Karabaş mahallesindeki evini Sâime bt. Ali’ye sattığı Mahmiye-i İstanbul’da Yenibahçe kurbunda Karabaş mahallesi sâkinlerinden Mehmed Çelebi b. Hasan nâm kimesne meclis-i şer‘-i şerîfde bâ‘isetü hâze’l-kitâb Sâime bt. Ali nâm hâtunun zevci ve tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân Mehmed Efendi b. Ömer ve Muslu Beşe b. Hüseyin nâm kimesneler şehâdetleri ile şer‘an sâbite olan Hüseyin Beşe b. Ahmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan tarîk-i âm ve bir tarafdan Sâliha Hâtun mülkü bir tarafdan Şeyh Abdullah Efendi mülkü ve bir tarafdan ba‘zan [198b] Medîne-i Münevvere vakfı ve ba‘zan haffâf ( ) mülkü ile mahdûd, tahtânî üç bâb oda ve iki sofa ve bir ahır ve bir su kuyusu ve bir kenîf ve zât-ı eşcâr-ı müsmire ve gayr-ı müsmire bahçeyi müştemil menzilimi, cümle tevâbi‘ ve levâhıkı ve kâffe-i hukūk ve merâfıkı ile müvekkile-i mezbûre Sâime Hâtun’a tarafeynden îcâb ve kabûlü hâviye şurût-ı müfsideden ârî bey‘-i bâtt-ı sahîh-i şer‘î ile üç yüz otuz sekiz esedî guruşa bey‘ ve teslîm ol dahi iştirâ ve tesellüm ve kabz ettiğinden sonra semeni olan meblağ-ı mezbûr üç yüz otuz sekiz esedî guruşu müvekkile-i mezbûre Sâime Hâtun yedinden tamâmen ahz u kabz eyledim ba‘dehu menzil-i mahdûd-ı mezkûr müvekkile-i mezbûrenin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hasan Efendi b. Mustafa el-İmâm, Ahmed Efendi b. Ali el-İmâm, Abdullah Çelebi b. Ramazan el-Müezzin, el-Hâc Mustafa b. Mehmed, Mustafa b. Hüseyin, Mehmed Çelebi Kethüdâ-yı muhzırân, el-Hâc Mustafa b. Tevekkül, İsmail Çelebi b. Mehmed.