İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 619 Hüküm no: 685 Orijinal metin no: [198a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Defter emini Yahya Efendi Mescidi Vakfı ile oğlu Ömer Efendi ve kızı Zeyneb’e ait vakıflara nâzır tayini Mahmiye-i İstanbul’da Altımermer kurbunda merhûm defter emîni Yahya Efendi Mescid-i şerîfi vakfının ve oğlu Ömer Efendi ve kızı Zeyneb vakıflarının nâzırı olma[ma]ğın, taraf-ı şer‘den nâzır nasb ve ta‘yîn olmak elzem ve ehem olmağın mescid-i şerîf-i merkūm cemâ‘atinden olup her vechile nezâret uhdesinden gelmeğe kemâ yenbağī kādir olan ashâb-ı hâze’l-kitâb İmâm Osman Efendi ve Solak Mustafa Ağa ve Yağlıkçı Mehmed Çelebi ve Hasan Ağa’dan her biri evkāf-ı mezbûreye hasbî nâzır nasb ve ta‘yîn olduklarında anlardan her biri dahi nezâret-i merkūmeyi kabûl ve merâsimini edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf. Şuhûdü’l-hâl: Fahrü’l-akrân el-Hâc Kemaleddin Kethüdâ-yı Hazret-i Efendi, Fahrü’l-akrân Hüseyin Ağa bin Üveys, el-Hâc Mehmed b. Ali, el-Hâc Mehmed b. Receb ve gayruhüm.