İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 53 Hüküm no: 2 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koğacı Dede mahallesi halkından Âmire bt. Süleyman Efendi’nin Mehmed Usta b. Hüsameddin’den muhâlaa yoluyla boşanması Mahmiye-i İstanbul’da Koğacı Dede mahallesinde sâkine Âmire bt. Süleyman Efendi nâm hâtûnun karındaşı ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Salih Çelebi b. Mehmed ve Ömer b. Mehmed nâm kimesneler şehâdetleriyle şer‘an sâbit olan Fazlullah Çelebi nâm kimesne meclis-i şer‘-i şerîf-i enverde zevc-i dâhili bâ‘is-i hâze’l-kitâb Mehmed Usta b. Hüsameddin nâm kimesne mahzarında bi’l-vekâle ikrâr ve takrîr-i kelâm edip müvekkile-i mezbûrenin zevci mezbûr Mehmed Usta zimmetinde mütekarrir ve ma‘kūdün-aleyh olan beş bin akçe mehr-i müeccel ve nafaka-i iddet-i mu‘ayyene-i ma‘lûmesi üzerlerine ve me’ûnet-i süknâsı dahi kendi üzerine olmak üzere zevci mezbûr Mehmed Usta ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl etdikden sonra hukuk-ı zevciyyete müte‘allika âmme-i da‘vâdan her biri âharın zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledikten sonra gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Receb Efendi b. ( ), İbrahim Beşe b. Sadık, Ali Bey b. Musli, Ali Beşe b. Mahmud, Halil Çelebi b. Mustafa.