İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 54 Hüküm no: 3 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukurbostan’da oturan Ayşe bt. Abdullah’ın boşandığı kocası Mustafa Beşe b. Hasan’dan çocuğu için nafaka alması Mahmiye-i İstanbul’da Sultan Selim kurbünde Çukurbostan içinde sâkine Âişe bt. Abdullah nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i mutallikı Mustafa Beşe b. Hasan mahzarında takrîr-i kelâm ve ta‘bîr ani’l-merâm edip mezbûr Mustafa Beşe’nin firâşından hâsıl ve benden mütevellid işbu oğlum Mustafa mezbûr Mustafa Beşe beni tatlîk edip bilâ-nafaka kalmağla sagīr-i mezbûrun nafaka ve kisve ve sâir levâzım-ı mühimmesi için babası mezbûr Mustafa Beşe üzerine kıbel-i şer‘den kadr-ı ma‘rûf akçe farz ve takdîr olunmak matlûbumdur dedikde hâkim-i muvakkı‘-ı sadr-ı kitâb tûbâ leh ve hüsnü-meâb hazretleri bi’t-terâzî sagīr-i mezbûr Mustafa’nın nafaka ve kisve ve sâir levâzım-ı zarûriyyesi için babası mezbûr Mustafa Beşe üzerine târih-i kitâbdan yevmî dokuz akçe farz ve takdîr edip meblağ-ı mefrûz-ı mezbûru sagīr-i mezbûrun levâzım-ı mühimmesine harc u sarfa ve lede’l-iktizâ istidâne ve inde’z-zafer mezbûr Mustafa Beşe üzerine rücû‘a vâlidesi mezbûre Âişe’ye izin verilmeğin mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: El-Hâc Yusuf b. Abdullah, Ali Çelebi b. Mehmed, el-Hâc Hüseyin b. Abdullah ve Ali Çelebi b. Şaban.