İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 56 Hüküm no: 6 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac İlyas Bey Vakfı’ndan gallesi olan Hüseyin Bey b. el-Hac İbrahim’in vakfın mütevellisi Yusuf Bey b. Abdullah hakkındaki şikayetinden vazgeçmesi Merhûm el-Hâc İlyas Bey nâm sâhibü’l-hayrın yedinde olan hüccet nâtık olduğu üzere evlâdından olup zikri âtî vakfın gallesine şart-ı vâkıf üzere mutasarrıf olan Hüseyin Bey b. el-Hâc İbrahim nâm kimesne meclis-i şer‘-i hatîrde vâkıf-ı mezbûrun mahmiye-i İstanbul’da Müftü Ali Çelebi mahallesinde vâki‘ lede’l-ahâlî ve’l-cîrân ma‘lûmü’l-hudûd beş bâb odaların mütevellîsi olan bâ‘is-i hâze’l-kitâb fahru’l-akrân Yusuf Bey b. Abdullah mahzarında ikrâr-ı tâm ve takrîr-i kelâm edip mezbûr Yusuf Bey zikr olunan odalardan bir bâb oda binâsı mülkü olmak üzere mutasarrıf olup arsasının kadîmden olageldiği üzere her senede yüz sekiz akçe mukāta‘a-i kadîmesini edâ edegelmiş iken gallesi bana meşrûta olmağla zikr olunan odanın senede mukāta‘a-i misliyesi üç yüz akçedir deyü da‘vâ ve nizâ‘ ve rencîde olunmuş idim. Min ba‘d da‘vâ-yı mezkûremden fâriğ olan kadîmi mukāta‘a-i misliyesi olan senede yüz sekiz akçeyi merkūm Yusuf Bey edâ edip galle bana meşrûta olmağla ziyâde da‘vâsıyla ben mu‘âraza etmemek üzere ta‘ahhüd edip zimmetini ibrâ eyledim, min ba‘d husûs-ı mezbûra müte‘allika da‘vâ ve nizâ‘ım yokdur dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fî evâhiri Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mehmed Efendi b. Mehmed, İbrahim Ağa Kethudâ-yı ( ) Efendi, el-Hâc Süleyman Çukadâr, Mehmed Efendi.