İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 57 Hüküm no: 8 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canbaz Markos v. Avanis’in Hüseyin Çelebi b. Mehmed’den sattığı atın parasının tahsilini istemesi Mahmiye-i İstanbul’da cânbâz tâifesinden Markos v. Avanis nâm zimmî meclis-i şer‘-i şerîfde yine tâife-i mezbûreden Hüseyin Çelebi b. Mehmed mahzarında üzerine da‘vâ ve takrîr-i kelâm edip mezbûr Hüseyin Çelebi işbu müşâhede olunan binek tarafının iki ayağı sekil yâğız al at mülkü olmak üzere kırk yedi buçuk guruş semen-i makbûza bana bey‘ ve teslîm, ben dahi ba‘de’l-iştirâ ve’t-tesellüm zikr olunan atı işbu Mirza Bey b. Abdullah’a otuz guruş semen-i makbûza bey‘ ve teslîm ol dahi iştirâ ve tesellüm edip yedinde iken hâlâ sadrâzam hazretlerinin baştezkireciliği hizmetinde olan Ahmed Efendi b. Şaban tarafından vekîl olduğu şuhûd-ı udûlla şer‘an sâbit olan Memiş Ağa b. Ahmed zikr olunan at müvekkil-i mûmâ-ileyh Ahmed Efendi’nin mülk ve hakkı olup târih-i kitâbdan yirmi beş gün mukaddem mülkünden zâyi‘ olmuşdu deyü da‘vâ ve müdde‘âsını udûl-ı müslimînden Mehmed Çavuş b. Ahmed ve el-Hâc Ali b. Abdullah şehâdetleriyle hâkim-i muvakkı‘-ı sadr-ı kitâb hazretlerinin huzûrunda mezbûrun muvâcehesinde şer‘an isbât ve mevkūfen ale’l-yemîn mârru’z-zikr atı hükm-i hâkimü’ş-şer‘de yedinden ahz u kabz eyledikden sonra mezbûr Mirza Bey dahi bana mürâca‘at edip benimdir deyü makbûzum olan meblağ-ı mezbûru benden da‘vâ ve kezâlik hükm-i hâkim ile ahz etmeğin hâlâ mezbûr Hüseyin Çelebi’ye suâl olunup semeni deyü medfû‘um olan meblağ-ı mezbûrun alıverilmesi matlûbumdur dedikde gıbbe’s-suâl mezbûr Hüseyin cevâbında fi’l-hakīka kaziyye vech-i muharrer üzere olup zikr olunan atı müdde‘î-i merkūma semen-i mezbûra bey‘ ve kabz-ı semen eylediğini ol dahi merkūm Mirza Bey’in semen-i makbûza mezbûra bey‘ edip zikr olunan at mezbûr Mirza Bey’in yedinde iken vekîl-i merkūm ber-vech-i mübeyyen da‘vâ ve hükm-i hâkimü’ş-şer‘de bi’l-istihkāk ahzedip, ol dahi müdde‘î-i mezbûra mürâca‘at edip semen-i merkūmu ahzını tav‘an ikrâr u i‘tirâf etmeğin mûcebiyle semen-i mezbûru müdde‘î-i merkūma redd ü teslîme mezkûr Hüseyin Çelebi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicce li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. Mehmed, Ali b. Bâli, Receb b. Osman.