İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 58 Hüküm no: 9 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samatya’da oturan Piro v. Panayot’un Kuzguncuk’ta ölen Todari’deki alacağını kefil olduğu iddiasıyla kardeşi Kostantin’den istemesi Mahmiye-i İstanbul’da Samatya kurbünde sâkin Piro v. Panayot nâm zimmî meclis-i şer‘-i şerîf-i enverde işbu râfi‘ü’l-vesîka Kostantin nâm zimmî muvâcehesinde üzerine da‘vâ ve takrîr-i kelâm edip mezbûr Kostantin’in karındaşı olup mahrûse-i Üsküdar’a tâbi‘ Kuzguncuk’da sâkin iken bundan akdem hâlik olan Todari zimmetinde cihet-i karz-ı şer‘îden seksen dört esedî guruş hakkım olup on iki sene mukaddem hasta ve sâhib-i firâş olup ben meblağ-ı mezbûru taleb eylediğimde mezkûr Kostantin meblağ-ı mezbûru benden al deyü kefil oldukdan sonra kable’l-edâ mezbûr Todari hâlik olmağın suâl olunup bi-hükmi’l-kefâlet meblağ-ı mezbûrun merkūmdan alıverilmesi matlûbumdar dedikde gıbbe’s-suâl ve akībe’l-inkâr müdde‘î-i mezbûrdan beyyine taleb olundukda kendi ve getirdiği şâhidi hâlik-i mezbûrun eb ve ceddi isimlerini bilmeyip ve onların esâmîsini bilir şâhidi olmadığını mu‘terif olduğundan mâ‘adâ mücerred benden al lafzı kefâlet olmamağın mezbûr Piro bî-vech mu‘ârazadan ba‘de’l-men‘ işbu vesîka [bi’t-]taleb ketb olundu. Fi’s-sâbi‘ aşer min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mustafa Çelebi b. el-Hâc Emin, İbrahim Çelebi b. Ahmed, Ali b. Sâbit, Ebûbekir b. Hüseyin ve gayruhüm.