İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 73 Hüküm no: 32 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veli Çelebi b. Mustafa’nın Ayastefanoz köyünden Aleksandrı v. Anton’dan alacağını tahsil etmesi Mahmiye-i İstanbul’da Yedikule kurbünde Bucakbağı mahallesinde sâkin Veli Çelebi b. Mustafa tarafından husûs-ı âti’l-beyâna vekîl olduğu hasm-ı câhid-i şer‘î muvâcehesinde Mustafa Ağa b. Yusuf ve İmâm Mustafa Efendi b. Ömer ve İbrahim Çelebi b. Mahmud şehadetleriyle şer‘an sâbit ve sübût-ı vekâletine hükm-i şer‘î lâhık olan Hasan Çelebi b. Abdullah meclis-i şer‘-i şerîfde Havâss-ı Aliyye kazâsı muzâfâtından Küçük Çekmece’ye tâbi‘ Ayastefanos nâm karye sükkânından işbu râfi‘ü’s-sifr Aleksandrı v. Anton Bey nâm zimmî muvâcehesinde bi’l-vekâle ikrâr ve takrîr-i kelâm edip müvekkilem mezbûr Veli Çelebi’nin merkūm Aleksandrı zimmetinde işbu hüküm hücceti nâtık olduğu üzere vezn ve mikdârı beynlerinde ma‘lûm buğday bahasından yüz on guruş ve saman bahasından altmış guruş ve yine arpa bahasından elli guruş ve vasfı beynlerinde ma‘lûm iki çift öküz bahasından elli guruş ve çift âlâtı bahasından on üç guruş ki cem‘an iki yüz seksen üç guruşu bana def‘ ve teslîm ben dahi yedinden vekâletim hasebiyle tamâmen ahz u kabz eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâdî ve’l-ışrîn min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: Mustafa Ağa b. Yusuf, Mustafa Efendi b. Ömer, el-Hâc İbrahim, Hasan Çelebi b. ( ), Hüseyin Çelebi b. Filan? Mustafa Beşe b. Kuloğlu, Hamza [b.] Mustafa.