İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 72 Hüküm no: 31 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukurbostan mahallesinden Ayşe bt. Boran’ın terekesinin varisleri arasında paylaşılması Mahmiye-i İstanbul’da Sultan Selim Hân -aleyhi’r-rahmetü ve’l-gufrân- Câmi‘-i şerîfi kurbünde Çukurbostan mahallesi sâkinelerinden iken bundan [akdem] vefât eden Âişe bt. Nurullah? nâm hâtûnun verâseti babası mezbûr Boran ve vâlidesi Ümmühânî bt. Mustafa nâm hâtûnla zevci Hüseyin b. Şaban nâm kimesneye münhasıra olduğu şer‘an zâhir ve mütehakkık olduğundan sonra mezbûrân Boran ve Ümmühânî’den her biri meclis-i şer‘-i âlîde tereke-i müteveffât-ı mezbûra vâzı‘u’l-yed olan işbu sâhibü’l-vesîka zevci mezbûr Hüseyin mahzarında ikrâr ve takrîr-i kelâm [edip] tereke-i müteveffât-ı mezbûreden iki köhne yastık ve bir minder ve bir döşek ve bir köhne yorgan ve üç sahan ve bir kahve tepsisi nısf hisse-i şer‘iyyemiz mukābelesinde mezbûr Hüseyin bize [redd] ü teslîm, biz dahi ahz u kabz eylediğimizden sonra müteveffât-ı mezbûrenin sâir terekesine ve mezbûrun zimmetinde mütekarrir ve ma‘kūdün-aleyh iki bin akçe mehr-i müecceline müte‘allika âmme-i da‘vâdan mezbûr Hüseyin’in zimmetini ibrâ-i âmm-ı râfi‘u’l-hısâm ile ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fî evâhiri Zilhicce sene 1099 Şuhûdü’l-hâl: Mehmed b. Şaban, Mahmud b. Şaban, Çörekçi Ahmed Çelebi, Resul b. Maksud, İbrahim [b.] Mehmed, Abdurrahman b. Abdullah, İbrahim [b.] Ahmed.