İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 74 Hüküm no: 34 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi Abor’un Mıgırdıç v. Begos’daki alacağını tahsil etmek istemesi Ekmekçi tâifesinden işbu bâ‘isü’s-sifr Apik v. ( ) nâm zimmî meclis-i şer‘-i şerîf-i enverde Mıgırdıç v. Bogos nâm zimmî muvâcehesinde üzerine da‘vâ ve takrîr-i kelâm edip mezbûr Mıgırdıç târih-i kitâbdan bir buçuk sene mukaddem elli esedî guruşumu ikrâz ve teslîm o dahi yedimden istikrâz ve kabz etmekle taleb eylediğimde bana edâdan imtinâ‘ edip hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda yine tâife-i mezbûreden Talmast v. Serkiz ve Haçador v. Bogos nâm zimmîler li-ecli’ş-şehâde meclis-i şer‘a hâzırân olup istişhâd olunduklarından fi’l-hakīka müdde‘î-i mezbûr Abor târih-i mezbûrda elli esedî guruşunu işbu mezbûr Mıgırdıç’a bizim huzûrumuzda ikrâz ve teslîm ol dahi ber-vech-i muharrer yedinden istikrâz ve kabz etmişdi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye eylediklerinde gıbbe ri‘âyet-i şerâ’iti’l-kabûl şehâdetleri makbûle olmağın mûcebince meblağ-ı mezbûr elli esedî guruşu müdde‘î-i mezbûra edâ ve teslîm merkūm Mıgırdıç’a tenbîh olunup mâ-hüve’l-vâkı‘ bi’t-taleb ketb olundu. Fi’s-sâmin aşer min-Zilhicce li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Hüseyin b. Mustafa, Ebûbekir b. Hüseyin, Ali b. Bâli.