İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 90 Hüküm no: 59 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Latife bt. Abdullah’ın öldükten sonra vasiyetini yerine getirmek üzere Receb Çelebi b. Mustafa’yı vasi tayin etmesi Mahmiye-i İstanbul’da Kâtib Muslihiddin mahallesi sâkinelerinden olup zâtı ma‘rifet-i şer‘iyye ile ârifân Mehmed Efendi b. Şaban ve Mehmed Efendi b. Ahmed ta‘rîfleriyle mu‘arrefe olan Latife bt. Abdullah nâm hatun meclis-i şer‘-i şerîf-i enverde zikri âtî vesâyâsını tenfîze vasiyy-i muhtâr nasb u ta‘yîn eylediği yine mahalle-i mezbûre sükkânından işbu sâhibü’l-vesîka Receb Çelebi b. Mustafa nâm kimesne mahzarında ikrâr ve takrîr-i kelâm edip bi-irâdetillâhi te‘âlâ fevt olduğumda işbu yedimde mülk ve hakkım olup eşyâ-i memlûkemden otuz sekiz dirhem bir sîm kuşak ve bir neftî kazak ve üç tencere ve dört sahan ve iki leğen ve iki yorgan ve bir kebîr tepsi ve bir kebîr güğüm ve bir sagīr güğüm ve bir keçe ve beş yastık ve iki döşek ve iki minder ve bir orta keçesi ve bir kahve ibriği ve bir velençemi mezbûr Receb Çelebi ahz u kabz ve Sûk-ı Sultânî’de semen-i misliyle âhara bey‘ ve semeninden üç bin akçesini techîz ve tekfîn ve levâzım-ı defnime harc u sarf eyledikden sonra mâ‘adâ her ne kalırsa gayrı vârisim olmamağla işbu hâzır bi’l-meclis ze[v]cim Hamza b. Mehmed’e teslîm ol dahi ahz u kabz eyleye deyü vasiyyet edip ve bu vasiyyetin tenfîzine mezbûr Receb Çelebi’yi vasiyy-i muhtâr ve ihtiyâr edip ol dahi vesâyet-i mezbûreyi kabûl ve merâsimini edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: Ali Efendi b. Hüseyin, Mehmed Efendi b. Hüseyin, Cafer Beşe b. Abdullah, el-Hâc Osman b. Abdullah, Şakir b Mehmed.