İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 90 Hüküm no: 58 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyun Emini Ahmed Ağa Vakfı’nın Ayşe bt. Mustafa Çavuş’daki alacağı Ashâb-ı hayrâtdan merhûm Koyun Emîni Ahmed Ağa Vakfı’na mütevellî olan işbu bâ‘isü’l-kitâb Mehmed Ağa meclis-i şer‘-i şerîf-i enverde mahmiye-i İstanbul’da Davud Paşa mahallesinde sâkine olup ta‘rîf-i şer‘î ile mu‘arrefe olan Âişe bt. Mustafa Çavuş mahzarında bi’t-tevliye üzerine da‘vâ ve takrîr-i kelâm edip mütevellîsi olduğum babam vâkıf-ı mezbûrun asl-ı mâlından mezbûre Âişe’ye idâne ve teslîm ol dahi istidâne ve kabz eylediği yedi yüz kırk iki esedî guruş ile devr-i şer‘î ile ilzâm olunan murâbaha-i şer‘iyyesinden dahi yüz on guruş ki cem‘an sekiz yüz elli iki esedî guruş deyni olup mukābelesinde Manyas kazâsına tâbi‘ Asaklı nâm karyede ma‘lûmü’l-hudûd çiftliği bi-tarîki’l-istiğlâl yedimde rehn olmağın hâlâ suâl olunup asl-ı mâl-ı mezbûr iki güzeşte murâbahasından min haysü’l-mecmû‘ sekiz yüz elli iki esedîsi matlûbumdur dedikde gıbbe’s-suâl mezbûre Âişe cevâbında fi’l-hakīka hâl bâlâda şerh ve beyân olunan minvâl üzere olup asl-ı mâl-ı mezbûr ile güzeşte murâbahasından cem‘an sekiz yüz elli iki esedî guruş zimmetinde vakf-ı mezbûra lâzımü’l-edâdan olduğunu ikrâr u i‘tirâf edip mûcebiyle ba‘de’l-hükm mukırre-i mezbûrenin kebîre kızı olup kezâlik ta‘rîf-i şer‘î ile mu‘arrefe olan Rukıyye bt. Mehmed nâm hatun mâl-ı mezbûra emr ve kabûlü hâviye kefâlet-i sahîha ile kefil olup mâ-vaka‘a bi’t-taleb ketb olundu. Fî evâhiri Zilhicce li-sene tis‘a ve tis‘în ve elf. Şuhûdü’l-hâl: es-Seyyid İbrahim Çelebi b. Mehmed, Mustafa Çelebi b. Mehmed, Mustafa Çelebi b. Hüseyin, Siyavuş b. Abdullah, diğer Siyavuş.