İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 92 Hüküm no: 63 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakraz v. Melkon’un kendisine düşen miras hisselerini kızkardeşi Turfanda’ya satması Mahmiye-i İstanbul’da Edirnekapısı kurbünde Ali Paşa-yı Atîk mahallesinde sâkin Bakraz v. Melkon nâm zimmî meclis-i şer‘-i şerîf-i enverde li-ebevyen kız karındaşı râfi‘atü hâze’l-vesîka Turfanda nâm E[r]meniye muvâcehesinde ikrâr ve takrîr-i kelâm edip mahalle-i mezbûrda vâki‘ bir tarafdan Melkon mülkü ve iki tarafdan Kirkor nâm zimmî mülkü ve bir tarafdan tarîk-i âm ile mahdûd fevkānî ve tahtânî dört bâb oda ve sofa ve bahçeyi müştemil mülk menzil iki yüz seksen [sekiz] sehimden i‘tibâr olunup sihâm-ı mezbûreden otuz altı sehmi vâlidem Maryem bt. Avanos nâm Ermeniye’nin ve yetmiş altı sehmi kız karındaşlarım mezbûre Turfanda ve Lusik’den hirbirinin ve yirmi dört sehmi ceddem diğer Maryem nâm Ermeniye’nin irsen mülk ve hakları iken mezbûr Haçador hâlik olup verâseti anası merkūme Maryem bt. Avanos ve karındaşı olduğum cihetle bana ve karındaşları mezbûretân Turfanda ve Lusik’e munhasıra olup ba‘dehû mezbûre Maryem bt. Avanos hâlike olup verâseti bana ve kızları mezbûretân Turfanda ve Lusik’e munhasıra olmağla merkūm Haçador’un menzil-i mezkûrda olan yetmiş altı sehm hissesinin ( ) sehmi bana ve on dokuz sehmi mezbûretân Turfanda ve Lusik’den herbirine ve merkūme Maryem bt. Avanos’un menzil-i merkūmede olan mârrü’l-beyân otuz altı sehm hissesinin on sekiz sehmi mezbûretân Turfanda ve Lusik’den herbirine isâbet ve intikāl eylediğinden sonra mezbûr Haçador’un hissesinden ber-vech-i muharrer bana isâbet eden otuz sekiz sehm hissemi merkūme Turfanda’ya mukaddemâ semen-i ma‘lûm ve makbûza bey‘ ve teslîm etmişdim, hâlen vâlidem mezbûre Maryem bt. Avanos’un hisse-i mezbûresinden isâbet eden on sekiz sehm hisse-i şer‘iyyemi dahi merkūme Turfanda’ya tarafeynden îcâb ve kabûlü hâvî bey‘-i kat‘î ile yirmi beş esedî guruşa bey‘ ve teslîm ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûru yedinden tamâmen ahz u kabz eyledim, fîmâ-ba‘d zikr olunan menzilin iki yüz seksen sekiz sehimden yüz yirmi iki sehmi irsen ve şirâen kız karındaşım mezbûre Turfanda’nın mülk ve hakkıdır, keyfe mâ yeşâ’ ve yahtâr mutasarrıfa olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’l-hâmis min-Zilhicceti’ş-şerîfe li-sene tis‘a ve tis‘în ve elf. Şuhûdü’l-hâl: İbrahim Çelebi b. Ahmed, Hasan b. Mustafa, Ebûbekir b. Hüseyin, Ali b. Bâli, Mustafa b. Abdullah.