İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 93 Hüküm no: 64 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mehmed’in kendisi ve çocuğunu bırakarak başka yere giden kocası Seyyid Mustafa Efendi b. Seyyid Mehmed’den nafaka talebi Mahmiye-i İstanbul’da Seyyid Ömer mahallesi sâkinelerinden Havvâ bt. Mehmed nâm hatun ba‘de’t-ta‘rîfi’ş-şer‘ meclis-i şer‘-i şerîf-i enverde takrîr-i kelâm ve ta‘bîr ani’l-merâm edip zevcim gāib ani’l-meclis es-Seyyid Mustafa Efendi b. es-Seyyid Mehmed nâm kimesnenin firâşından hâsıla ve benden mütevellide kızım Ümmügülsüm nâm sagīreyi bilâ-nafaka bırakıp âhar diyâra gitmekle bana ve kızım sagīre-i mezbûre[ye] gāib-i mezbûrun üzerine kıbel-i şer‘den kadr-ı ma‘rûf nafaka farz ve takdîr olunmak matlûbumdur dedikde ba‘de’t-tahlîfi’ş-şer‘î hâkim-i muvakkı‘-ı sadr-ı kitâb tûbâ leh ve hüsnü-meâb hazretleri dahi mezbûre Havvâ için yevmî dokuz akçe ve sagīre-i mezbûre için yevmî altışar akçeden cem‘an gāib-i mezbûrun üzerine târih-i kitâbdan beher yevm on beşer akçe nafaka farz ve takdîr edip mebâliğ-i mefrûz-ı mezbûru ba‘de’l-istidâne kendisinin ve sagīre-i mezbûrenin levâzımına sarfa ve lede’z-zafer mezbûr es-Seyyid Mustafa Efendi üzerine rücû‘a mezbûre Havvâ’ya izin vermeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilhicce li-sene tis‘a ve tis‘în ve elf. Şuhûdü’l-hâl: Ebûbekir Çelebi b. Ahmed, Ali Çelebi b. ( ), Ali Çelebi.