İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 120 Hüküm no: 106 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid Aslan Çelebi b. es-Seyyid Mustafa’nın Panayot v. Kanalo’daki alacağını kefili olan Hıristo v. Yani’den istemesi Mahmiye-i İstanbul’da Elvanzâde mahallesinde sâkin es-Seyyid Aslan Çelebi b. es-Seyyid Mustafa meclis-i şer‘-i şerîfde işbu râfi‘ü’l-kitâb İşkenbeci Hıristo v. Yani nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Unkapanı dâhilinde vâki‘ işkenbeci dükkânımda müste’cir olan gāib ani’l-meclis Panayot v. Kanalo nâm zimmî zimmetinde üç ayda müctemi‘ olan icâreden bin iki yüz altı akçe ile beynimizde ma‘lûm bir kazgan bahâsından bin dört yüz elli akçe ki cem‘an üç bin yüz akçe hakkım olmağla mezbûr Hıristo tarafından emr ve kabûlü hâviye kefâletle kefili olmağın bundan akdem meblağ-ı mezbûru kefâlet-i mezbûresine binâen mezbûr Hıristo’dan taleb ve da‘vâ eylediğimde ol dahi kefâlet-i mezbûreyi inkâr edip ben dahi mezbûr Hıristo meblağ-ı mezbûra kefâletini şuhûd-ı udûl muvâcehesinde vech-i şer‘î üzere isbât edip hükm-i şer‘î lâhik olmuşdu, hâlâ da‘vâ-yı mezkûremden beni mezbûr Hıristo ile iki bin beş yüz otuz akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki bin beş yüz otuz akçe kefâlet-i mezbûresine binâen mezbûr Hıristo yedinden tamâmen ahz u kabz eylediğimden sonra meblağ-ı mezbûr bin dört yüz yetmiş akçeye ve kazgana müte‘allika da‘vâdan mezbûr Hıristo’nun zimmetini ibrâ-i âm ile ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’t-tâsi‘ min-Muharremi’l-harâm li-sene mi’e ve elf. Şuhûdü’l-hâl: es-Seyyid Abdullah, Ömer Efendi b. Mehmed, Mustafa Beşe el-Mübâşir, İşkenbeci Hüseyin Beşe, İbrahim Çelebi b. Ahmed, Siyavuş.