İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 119 Hüküm no: 105 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haslar kasabasından Mehmed Ağa b. Ahmed’in çiftliğinden kaybolan ve Ahmed b. Mehmed’in elinde bulduğu bargirini geri almak istemesi Hazret-i Ebî Eyyüb el-Ensârî muzâfâtından Haslar nâm kasabada sâkin olup mahmiye-i İstanbul’da müsâferet vechi üzere sâkin Mehmed Ağa b. Ahmed meclis-i şer‘-i şerîf-i enverde Ahmed b. Mehmed mahzarında üzerine da‘vâ ve takrîr-i kelâm edip elân mezbûr Ahmed’in yedinde olup işbu mahalde mevcûd bir elmacığı eksik demir kır bârgir benim yedimde mülk ve hakkım iken târih-i kitâbdan on üç gün mukaddem kasaba-i mezbûrede vâki‘ çiftliğimden zâyi‘ olmuşdu, hâlâ mezbûr Ahmed’in yedinde buldum, taleb ederim, suâl olunsun dedikde gıbbe’s-suâl mezbûr Ahmed cevâbında ben mârru’z-zikr bârgiri târih-i kitâbdan sekiz gün mukaddem mahrûse-i Edirne’de Hasan nâm kimesne yedinden on sekiz guruşa iştirâ ve tesellüm eyledim, müdde‘î-i merkūmun vech-i muharrer üzere mülkü olup târih-i merkūmdan mülkünden zâyi‘ olduğu ma‘lûmum değildir deyicek, müdde‘î-i mezbûrdan müdde‘âsını mübeyyin beyyine taleb olundukda udûl-ı müslimînden olup mahrûse-i Hazret-i Ebî Eyyüb’de Defterdâr mahallesinde sâkin Abdurrahman Çelebi b. Mahmud ve Abdullah b. Mahmud ve Mustafa b. Ahmed ve Osman b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu mahalde mevcûd olan mârru’z-zikr demir kır bârgir müdde‘î-i mezbûrun yedinde mülkü olup târih-i kitâbdan on üç gün mukaddem mülkünden zâyi‘ olmuşdu, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle oldukdan sonra mârru’z-zikr demir kır bârgiri bir vechile mülkünden ihrâc etmediğine müdde‘î-i mezbûr Mehmed Ağa’ya yemîn teklîf olundukda ol dahi alâ hasebi’l-mes’ûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm mârru’z-zikr bârgiri müdde‘î-i mezbûra redd ü teslîme mezbûr Ahmed’e tenbîh birle mâ-hüve’l-vâkı‘ bi’t-taleb ketb olundu. Fi’l-yevmi’s-sâbi‘ min-Muharremi’l-harâm li-sene mi’e ve elf. Şuhûdü’l-hâl: Hüseyin Çelebi, İsmail b. Mustafa, Çukadâr Ahmed b. Mehmed, Ali b. Bâli.