İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 121 Hüküm no: 108 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siyami b. Maksud b. Mehmed’in varisleri olan hanımı Gülistan bt. Abdullah ile kardeşi Mahmud’un kendilerine miras kalan evi Mehmed Çelebi b. Ahmed’e satmaları Mahmiye-i İstanbul’da Debbâğ Yunus mahallesi sükkânından iken bundan akdem fevt olan Siyami b. Maksud b. Mehmed nâm kimesnenin verâseti zevce-i metrûkesi Gülistan bt. Abdullah nâm hatun ile li-ebeveyn er karındaşı Mahmud nâm kimesneye munhasıra olduğu şer‘an zâhir ve müte‘ayyin oldukdan sonra kendi tarafından asîl ve mezbûre Gülistan tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Mehmed Çelebi b. Hüseyin ve Ömer Çelebi b. el-Hâc Mehmed şehâdetleriyle şer‘an sâbit olan merkūm Mahmud meclis-i şer‘-i şerîf-i enverde işbu bâ‘isü’l-kitâb Mehmed Çelebi [b.] Ahmed mahzarında ikrâr-ı tâm ve takrîr-i kelâm edip mûrisimiz müteveffâ-yı mezbûrun terekesinden olup mahalle-i mezbûrede vâki‘ bir tarafdan Medîne-i Münevvere Vakfı’ndan olan menzil ve bir tarafdan tarîk-i âm ile mahdûd fevkānî bir oda ve tahtânî bir sofa ve bir havlu ve kenîfi müştemil menzilimi bi-cümleti’t-tevâbi‘ ve’l-levâhık tarafından îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Çelebi’ye yüz yetmiş beş esedî guruşa bey‘ ve temlîk ve teslîm ol dahi iştirâ ve kabûl ve temellük ve tesellüm eylediğinden sonra semeni olan meblağ-ı mezbûr yüz yetmiş beş guruşu yedinden tamâmen ahz u kabz eyledim, fîma-ba‘d menzil-i mahdûd-ı mezkûr merkūm Mehmed Çelebi’nin mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li-sene mi’e ve elf. Şuhûdü’l-hâl: Mustafa Çelebi Muhzır, el-Hâc Şaban b. Ebûbekir, Osman Beşe b. Ömer, Hüseyin Çelebi b. Ali ve gayruhüm.