İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 122 Hüküm no: 109 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Leblebici taifesi kethüdası ve ustalarının, İvaz b. Abdullah’ın adetlerine aykırı olarak dükkan açmasının önlenmesini istemeleri Mahmiye-i İstanbul’da vâki‘ Leblebici tâifesinden hâlâ kethudâları olan es-Seyyid Hüseyin Çelebi b. es-Seyyid Receb ve üstâdlarından Mehmed b. Hüseyin ve Ali Beşe b. Mehmed ve Ahmed b. Mehmed ve Mustafa b. Mehmed ve Mehmed b. Mustafa ve diğer Mehmed b. Mustafa ve Receb b. Mehmed ve Üstâd İvaz b. Abdullah ve Mustafa [b.] Şaban ve Receb b. Mustafa ve Süleyman b. Davud ve Himmet b. Mahmud ve sâirleri meclis-i şer‘-i şerîf-i enverde tâife-i mezbûreden İvaz b. Abdullah mahzarında her biri takrîr-i da‘vâ edip kadîmü’l-eyyâmdan mahmiye-i İstanbul’da olan leblebici dükkânların mahsûs ve mu‘ayyen vezâyif-i mezbûreden tâlib olanlar istedikleri mahallerde dükkân ihdâs etmek kemâl-i ihtilâlden nâşî memnû‘ olup hattâ husûs-ı mezbûr için yedimizde fermân-ı şerîf-i âlîşân olup ve merkūm İvaz’ın yedinde kadîmden olan leblebici dükkânlarından dükkân olup kâr-ı kesb ederken kanâ‘at etmeyip kadîmden olan ittifâkımıza mugāyir semt-i âharda dükkân ihdâs ve ol vechile beynimizde ihtilâle bâdî olmağın suâl olunup hilâf-ı fermân-ı âlî vaz‘ u hareketden men‘ olunması matlûbumuzdur deyü tekellümünü min külli’l-vücûh takrîr-i meşrûhasını nâtık fermân-ı âlî ibrâz etdiklerinde gıbbe’s-suâl mezbûr İvaz dahi hâl bâlâda tafsîl olunan minvâl üzere olduğunu ikrâr u i‘tirâf etmeğin mûcebiyle mezbûr İvaz kadîmden olunagelen ittifâklarımıza mugāyir vaz‘ etmemek üzere ba‘de’t-tenbîh mâ-vaka‘a bi’t-taleb ketb olundu. Fi’l-yevmi’l-âşir mine’l-Muharremi’l-harâm li-sene mi’e ve elf. Şuhûdü’l-hâl: Mustafa Çelebi b. Ahmed, İbrahim Çelebi [b.] Ahmed, Mehmed b. Ahmed, Ebûbekir b. Hüseyin.