İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 143 Hüküm no: 141 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia bt. Abdullah’ın kendisini boşayan Hüseyin Beşe b. Abdullah’dan mehir ve nafakasını alması Mahmiye-i İstanbul’da Sarı Musa mahallesinde sâkine Râbia bt. Abdullah nâm hatuun karındaşı ve tarafından husûs-ı âti’l-beyâna vekîli olduğu zâtı ma‘rifet-i şer‘iyye ile ârifân Mehmed b. Ahmed ve Ahmed b. Receb nâm kimesneler şehâdetleriyle şer‘an sâbit olan Ali Beşe nâm kimesne meclis-i şer‘-i şerîf-i enver ve mahfil-i dîn-i münîf-i ezherde müvekkile-i mezbûrenin zevc-i mutallıkı bâ‘isü’l-kitâb Hüseyin Beşe b. Abdullah nâm kimesne mahzarında bi’l-vekâle ikrâr ve takrîr-i kelâm edip mezbûr Hüseyin Beşe müvekkilem mezbûreyi târih-i kitâb günü bâyinen tatlîk etmekle zimmetinde mütekarrir ve ma‘kūdün-aleyh olan iki bin akçe mehr-i müecceli ve nafaka-i iddet ve me’ûnet-i süknâsı için bi’t-terâzî ta‘yîn olunan üç yüz akçe ki min haysü’l-mecmû‘ iki bin üç yüz akçeyi zevci mezbûr Hüseyin Beşe yedinden tamâmen ahz u kabz edip hukuk-ı zevciyyete müte‘allika âmme-i da‘vâdan mezbûr Hüseyin Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Mehmed Odabaşı b. ( ), Mehmed Çelebi b. Abdullah, Hüseyin Beşe b. Mustafa, Mehmed b. Ali ve gayruhüm mine’l-huzzâr.