İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 145 Hüküm no: 144 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. Ömer’in Beykoz’da Meryemzâde mahallesindeki evini Yusuf b. Abdullah’a satması Mahmiye-i İstanbul’da Gürcübaşı mahallesinde sâkine Neslihan bt. Ömer nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde işbu bâ‘isü’l-kitâb Yusuf b. Abdullah mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup Yoros kazâsına tâbi‘ Beykoz’da Meryemzâde mahallesinde vâki‘ bir tarafı dere ve bir tarafı tarîk-i âm ve bir tarafı Mahmud Hocaoğlu mülkü ve bir tarafı sipâhî veresesi ve bir tarafı Ümmühânî Hatun menzili ile mahdûd gurûsesinden? tûlen yirmi bir ve arzen on altı zirâ‘ının Emine Hatun Vakfı’na senede altmış akçe mukāta‘ası olup fevkānî iki oda ve bir sofa ve bahçe ve köşkü müştemil menzilimi bi-cümleti’t-tevâbi‘ mezbûr Yusuf’a yüz on esedî guruşa bey‘ ve temlîk ve teslîm, ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr yüz on esedî guruşu yedinden alıp kabz eyledim, ba‘de’l-yevm menzil-i mezbûr mezkûr Yusuf’un mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: el-Hâc Süleyman, el-Hâc Abdi, Mehmed Çelebi, Mehmed b. Hüseyin, Musa Beşe b. ( ). Ramazan [b.] İbrahim.