İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 145 Hüküm no: 145 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Şiro’nun Ahmed Çelebi b. Halil’de altın alacağı olduğu iddiası Mahmiye-i İstanbul’da Çakır Ağa mahallesinde sâkin Yamandi v. Şiro nâm zimmî meclis-i şer‘-i şerîf-i enverde işbu râfi‘ü’l-kitâb Ahmed Çelebi b. Halil mahzarında üzerine da‘vâ ve takrîr-i kelâm edip ben târih-i kitâbdan iki sene mukaddem vilâyet-i Rumeli’nde İsakçı kasabasından mahalle-i mezbûrede sâkine zevcem Sofya bt. Yobiso nâm nasrâniyeye îsâle eyle deyü mâlımdan mezbûr Ahmed Çelebi’ye otuz iki kıt‘a Üngürüs altınımı def‘ ve teslîm, ol dahi ber-vech-i muharrer ahz u kabz edip ve denânîr-i mezbûrenin on beş altınını zevce-i mezbûreye teslîm edip bâkīsi olan on yedi altını kendi mesârifine sarfla istihlâk etmeğin mezbûra suâl olunup mikdâr-ı mezkûr altını bana teslîme tenbîh olunmak matlûbumdur dedikde gıbbe’s-suâl mezbûr Ahmed Çelebi cevâbında fi’l-vâki‘ müdde‘î-i mezbûr zevcesi mezbûre Sofya’ya îsâl için kendüye mikdâr-ı mezkûr altın def‘ ve teslîm eylediğini ikrâr ve denânîr-i mezkûremi mezbûre Sofya’ya yedimden îsâl ve teslîmini iş‘âr edip lâkin denânîr-i mezbûreyi mesârifine sarfla istihlâki hasebiyle zimmetine zımân tertîbini bi’l-külliye inkâr edip mezbûr Ahmed Çelebi’nin yedine emânet olduğu cihetle kavl-i mezbûruna yemîn ile musaddak olmağın mezbûr Ahmed Çelebi tahlîf-i şer‘î ile tahlîf olundukdan sonra bî-vech mu‘ârazadan men‘ birle mâ-hüve’l-vâkı‘ bi’t-taleb ketb olundu. Fi’l-yevmi’s-sâlis ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed Çelebi, Mustafa b. Ömer, İsmail b. Mustafa ve gayru[hum].