.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 103
Hüküm no: 99
Orijinal metin no: [15a-4]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Alime bt. Yakub’un Hamza Bey Evkafı’na ait evinin tasarrufunu devrettiği

Dârü’s-saltanatü’s-seniyye Kostantıniyyeti’l-mahmiye mahallâtından Üsküblü Mahallesi’nde sâkin Alime bt. Ya‘kub nâm hatun meclis-i şer‘-i hatîr-i lâzımü’t-tevkīrde işbu râfi‘u’l-vesîkati’ş-şer‘iyye Mansur b. Nureddin mahzarında ikrâr-ı tâm ve takrîr-i kelâm edip merhûm Hamza Bey Evkāfı’ndan olup icâre-i mu‘accele ve müeccele ile tasarrufumda olan mahalle-i mezbûrede vâki‘ bir tarafı yine mezbûr Mansur mutasarrıf olduğu oda ve bir tarafı Kerime Hatun mutasarrıfe olduğu oda ve bir tarafı Halil Mehmed odası ve tarîk-i âm ile mahdûd birbirine mülâsık iki bâb tahtânî odaları ve kenîfi müştemil olan menzilin hakk-ı tasarrufunu vakf-ı mezbûr mütevellîsi ma‘rifetiyle dokuz bin nakd râyic fi’l-vakt fıddî akçe bedel mukābelesinde ferağ ve tefvîz edip ol dahi minvâl-i muharrer üzere tefevvüz ve kabûl eyledikden sonra meblağ-ı mezbûr dokuz bin akçeyi yedinden bi’t-tamam ve’l-kemâl ahz u kabz eyledim ba‘de’l-yevm menzil-i mezbûrda benim alâkam kalmayıp mezbûr Mansur’un dâhil-i taht-ı tasarrufu olmuşdur dedikde gıbbe’t-tasdîk ve’t-taleb mâ-vaka‘a ketb ü sebt olundu.

Tahrîren fi’l-yevmi’r-râbi‘ aşer min-Şevvâli’l-mükerrem li-sene selâse ve sittin ve elf.

Şuhûdü’l-hâl: El-Kādı Mehmed Beşe, el-Hâc Cemaleddin Beşe b. Ömer, el-Hâc Şemseddin b. el-Hâc Nimetullah, el-Kādı Hayreddin.