İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 171 Hüküm no: 183 Orijinal metin no: [38a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Değirmenci Pavlo v. Yani’nin uncu taifesinden Panagos v. Kanilo ve Dimitri v. Yorgi’den alacaklı olduğu iddiasının asılsız olduğu Mahmiye-i İstanbul’da Arabacılar mahallesinde sâkin Değirmenci Pavlo v. Yani nâm zimmî meclis-i şer‘-i şerîf-i enverde mahalle-i mezbûrede Balçıkfırını kurbünde sâkin uncu tâifesinden işbu bâ‘isü’l-vesîka Panagos v. Kanilo ve Dimitri v. Yorgi nâm zimmîler muvâcehelerinde üzerlerine da‘vâ ve takrîr-i kelâm edip mezbûrân Panagos ve Dimitri’nin şerîkleri gāib ani’l-meclis Ziga v. Kanilo nâm zimmî zimmetlerinde cihet-i deyn-i şer‘îden yüz elli guruş hakkım olmağla bundan akdem mezbûrân Panagos ve Dimitri ve âhar şerîkleri Ahmaki nâm zimmî dahi her biri meblağ-ı mezbûra kefîl olmuşlardı, hâlâ mezbûrâna suâl olunup kefâletlerine binâen meblağ-ı mezbûru bana edâya tenbîh olunmaları matlûbumdur dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline muvâfık beyyine taleb olundukda isbât için istimhâl etmekle mehl-i şer‘î verilip müddet-i mehl münkaziye olup ve müdde‘î-i mezbûr bir vechile isbât-ı beyyineye [38b] kādir olamayıp istihlâf etmeğin fi’l-hakīka müdde‘î-i mezbûrun gāib-i mezbûr Ziga’nın zimmetinde hakkı olan meblağ-ı mezbûr yüz elli guruşa ber-vech-i mezkûr her biri kefîl olmayıp ol vechile üzerlerinde müdde‘î-i mezbûrun hakkı olmadığına mezbûrân Panagos ve Dimitri’ye yemîn teklîf olundukda her biri dahi [alâ] vefki’l-mes’ûl yemîn billâhillezî enzele’l-İncîle alâ İsa -aleyhisselâm- etmeğin mûcebince müdde‘î-i mezbûr Pavlo bilâ-beyân mu‘ârazadan men‘ olunup mâ-vaka‘a bi’t-taleb ketb olundu. Fî gurreti Saferi’l-hayri’l-mübârek li-sene mi’e ve elf. Şuhûdü’l-hâl: Mehmed Çavuş b. ( ) el-Mübâşir, İbrahim Çelebi b. Ahmed, Mustafa b. Şaban, Ebûbekir b. Hüseyin.