İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 170 Hüküm no: 182 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalemkâr Aslan v. Tanaş ile karısı Toka bt. Yamandi’nin mülk evlerini oğullarına satmaları Mahmiye-i İstanbul’da Mirahor mahallesinde sâkin Kalemkâr Aslan v. Tanaş nâm zimmî ve zevcesi Toka bt. Yamandi nâm nasrâniye zâtı ba‘de’t-ta‘rîfi’ş-şer‘î meclis-i şer‘-i şerîfde sulbî kebîr oğulları işbu râfi‘ü’l-kitâb Soti ve Kostantin ve Yanaki ve Bagram ve Panayot nâm zimmîler muvâcehesinde her biri ikrâr ve takrîr-i kelâm edip yedimizde mülkümüz olup mahalle-i mezbûrede vâki‘ bir tarafdan Asvadar menzili ve bir tarafdan Nesli Hatun menzili ve bir tarafdan Kebeci menzili ve bir tarafdan tarîk-i âm ile mahdûd fevkānî iki oda ve tahtânî bir oda ve sofa ve bir kemhâcı kârhânesi ve müşterek su kuyusu ve bahçeyi müştemil mülk menzilimizi cümle-i tevâbi‘ ve levâhıkıyla oğullarımız merkūmûna yüz altmış beş guruşa bey‘-i kat‘î ile bey‘ ve teslîm onlar dahi iştirâ ve tesellüm ve kabûl etdiklerinden sonra semeni olan meblağ-ı mezbûr yüz altmış beş guruşu yedlerinden tamâmen ahz u kabz eyledik, fîmâ-ba‘d menzil-i mahdûd-ı mezkûrda bizim kat‘â alâkamız kalmamışdır, oğullarımız mezbûrûn Soti ve Kostantin ve Yanaki ve Bagram ve Panayot’un ale’l-iştirâki’s-seviy mülk-i müşterâları olmuşdur dediklerinde gıbbe’t-tasâduki’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Muharremi’l-harâm li-sene mi’e ve elf. Şuhûdü’l-hâl: Şeyh Ahmed Efendi b. Hamza, es-Seyyid Abdullah Efendi b. ( ) el-İmâm, Abdülkadir Efendi b. İsmail, Mehmed Çelebi Attâr, İbrahim Çelebi b. Ahmed.