İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 196 Hüküm no: 221 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kiryazi v. Yorgi’nin Yani v. Todori’de olan alacağının bir kısmını tahsil etmesi Bakkal tâifesinden olup mahmiye-i İstanbul’da vâki‘ Aksaray çarşısında sâkin Kiryazi v. Yorgi nâm zimmî meclis-i şer‘-i şerîf-i enverde tâife-i mezbûreden olup mahmiye-i mezbûrede Tahtakale sûkunda sâkin işbu bâ‘isü’l-vesîka Yani v. Todori nâm zimmî muvâcehesinde ikrâr-ı tâm ve takrîr-i kelâm edip yedimde olan işbu hüccet-i şer‘iyye nâtık olduğu üzere bundan akdem mezbûr Yani’den senin ve şerîkinin gāib ani’l-meclis Sultan b. Nikola nâm mühtedî zimmetinizde cihet-i karzdan ve eşyâ bahâsından altmış bin akçe hakkım olup ve her biriniz âharın zimmetine lâzım gelen meblağa kefîl olmuşsuz deyü meblağ-ı mezbûr altmış bin akçeyi asâleten ve kefâleten taleb ve da‘va etdiğimde ol dahi cevâbında ber-vech-i mübîn asâleten bana otuz bin akçe deyn olduğun ikrâr ve kefâleten mezbûreyi inkâr etmişidi. Hâlâ mezbûr Yani asâleten deyni olan otuz bin akçenin on beş bin akçesini bana edâ ve teslîm ben dahi ahz u kabz ve bâkī on beş bin akçesini târîh-i kitâbdan yüz yirmi güne değin te’cîl ve imhâl etdiğimden sonra mezbûr Yani’yi kefâletden ihrâc edip ba‘de’l-yevm meblağ-ı bâkī-i mezbûr on beş bin akçeden mâ‘adâ husûs-ı mezbûra müte‘alika âmme-i da‘vâdan mezbûr Yani’nin zimmetini ibrâ-i âmmla ibrâ ve ıskāt eyledim dedikde gıbbe’t-tasdîki’l-vicâhî mâ-vaka‘a bi’t-taleb ketb. Fi’l-yevmi’s-sâlis min-Saferi’l-hayr li-sene mi’e ve elf Şuhûdü’l-hâl: Veli Beşe b. Ahmed, Abdülkādir Çelebi, Osman Çavuş, İbrahim Çelebi b. Ahmed, Yani v. Dimo, Todori v. Mihal, Yorgi v. Mihal, Dimo Todori, Todori v. Estemati