İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 195 Hüküm no: 220 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergah-ı Alî yeniçerileri ikinci bölük neferlerinden İsmail Beşe b. Receb’in tarla hissesini Osman Efendi b. Mehmed’e satması Vilâyet-i Anadolu’da Bolu sancağında Üskûbî kazâsına tâbi‘ Aşağıdere nâm karye ahâlîsinden olup Dergâh-ı âlî yeniçerilerinin ikinci bölüğü neferâtından İsmail Beşe b. Receb nâm kimesne meclis-i şer‘-i şerîf-i enverde işbu sâhibü’l-vesîka Osman Efendi b. Mehmed mahzarında ikrâr ve takrîr-i kelâm edip tefvîz-i âti’z-zikrin sudûruna değin ammim oğlu Veli b. Ahmed ile ale’l-iştirâki’s-seviy taht-ı tasarrufumuzda olup karye-i mezbûre sınırı dâhilinde Han Vakfı dimekle ma‘rûf mevzi‘de vâki‘ bir tarafdan müşteri-yi mezbûr Osman Efendi tarlası ve bir tarafdan el-Hâc Mehmed veresesi tarlası ve bir tarafdan dere ve bir tarafdan tarîk-i âm ile mahdûd tahmînen elli keyl tohum istî‘âb eder tarlada olan nısf hisse-i şâyi‘amın hakk-ı tasarrufunu sâhib-i arz ma‘rifetiyle mezbûr Osman Efendi’ye üç guruş bedel mukābelesinde ferâğ ve tefvîz ol dahi tefevvüz ve kabûl eylediğinden sonra bedel-i mezkûr üç aded guruşu mezbûr Osman Efendi yedinden alup kabz edip ba‘de’l-yevm mârru’z-zikr tarlada olan hisse-i şâyi‘amı mahallinde kabz ve tasarrufa mezbûr Osman Efendi’yi taslît eyledim dedikde gıbbe’t-tasdîk mâ-hüve’l-vâkı‘ bi’t-taleb ketb olundu. Fî 12 Safer li-sene mi’e ve elf Şuhûdü’l-hâl: Abdurrahim Beşe b. Murtaza, Molla Mustafa b. Şaban, Molla Mehmed b. Receb, Ahmed Halifezâde Molla İbrahim, İbrahim Çelebi b. Taha