İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 197 Hüküm no: 223 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenişehir kazasına bağlı Fener nahiyesinin Ayayorgi köyü halkından Polbedro? v. Şamagi’nin cizyesini Vâlide Sultan-ı Atik Vakfına ödediği Vilâyet-i Rumeli’de Yenişehir kazâsına tâbi‘ Fenar nâhiyesinde Ayayorgi nâm karye ahâlisinden ber-vech-i maktû‘ cizyelerin cem‘ u tahsîl ve mahalline teslîme vekîl-i müsecceli olan Ariston v. Karabet meclis-i şer‘-i şerîf-i enverde işbu bâ‘isü’l-vesîka Polyeder v. Yani nâm zimmî muvâcehesinde üzerine da‘vâ ve takrîr-i kelâm edip mezbûr Polyeder fi’l-asl karye-i mezbûre re‘âyâsından olmağla işbu sene-i mübârekede uhdesinde edâsı lâzım gelen cizyesini teslîmden imtinâ‘ eder, suâl olunup edâya tenbîh olunması matlûbumdur dedikde gıbbe’s-suâl mezbûr Polbedro cevâbında, ben işbu yedimde olan sûret-i defter-i hâkānî mantûk-ı münîfi üzere merhûme cennet-mekân Vâlide Sultan-ı Atîk Evkāfı’na kayd olunmuş re‘ayâdan olmağla beher sene üzerime lâzım gelen cizyemi vakf-ı mezbûr re‘âyâsı ile ma‘an edâ edegelmiş ve bu sûret-i defter-i hâkānî ibrâz edip nazar olundukda fi’l-hakīka mezkûr Polyeder merhûme Vâlide Sultan-ı Atîk Vakfı’nın defterlü re‘âyâsından olup beher sene üzerine edâsı lâzım gelen cizyesini vakf-ı mezbûr re‘ayâsı ile ma‘an edâ edegeldiği lede’ş-şer‘i’l-enver zâhir ve mukarrer olmağın mûcebiyle müdde‘î-i mezbûr bî-vech mu‘âraza etmemek üzere işbu vesîka bi’t-taleb ketb olundu. Fi’l-yevmi’l-âşir min-Saferi’l-hayr li-sene mi’e ve elf. Şuhûdü’l-hâl: İbrahim Çelebi b. Ahmed, Mehmed Efendi b. Mustafa, Ebûbekir Efendi b. Abdullah, Ali b. Bekir, Yanaki v. Todori, Anton v. Tanaş, Marat v. Avadik, Esayi v. Asvador, Mihal v. Kanim, Yamandi v. Anton.