İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 198 Hüküm no: 224 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. İstemati’nin Abdisubaşı mahallesinde bulunan evini Baklacıoğlu Dimitri v. Manol’a satması Mahmiye-i İstanbul’da Fenerkapısı hâricinde Abdi Subaşı mahallesinde sâkin Dimitri v. İstemati nâm zimmî tarafından husûs-ı âti’l-beyâna vekîl olup Manol v. Estemat ve Yorgo v. Bedo şehâdetleriyle şer‘an vekâleti sâbite olan Palologi v. Anderya nâm zimmî meclis-i şer‘-i şerîf-i enverde işbu bâ‘isü’l-vesîka Baklacıoğlu Dimitri v. Manol muvâcehesinde bi’l-vekâle ikrâr-ı tâm ve takrîr-i kelâm edip müvekkilem mezbûr Dimitri akd-i âtî sudûruna değin silk-i mülkünde münselik olup mahalle-i mezbûrede vâki‘ bir [tara]fı Mihalaki v. Yorgi mülkü ve bir tarafı ba‘zen Kortaki v. Todori ve ba‘zen Sinbat mülkleri ve bir tarafı tarîk-i âm ve bir tarafı sâhil-i bahır ile mahdûd tûlen yirmi üç zirâ‘ ve arzan deryâ cânibi beş zirâ‘ ve kara tarafı dört buçuk zirâ‘ bi-hesâb-ı terbî‘î yüz on iki zirâ‘ arsa üzerinde mebnî fevkânî ve tahtânî dört bâb oda ve bir mahzen ve bir sagīr matbah ve kenîfi müştemil mülk menzilin cemî‘ tevâbi‘ ve levâhıkı ile mezbûr Dimitri’ye yetmiş iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr yetmiş iki bin akçeyi cihet-i karz-ı şer‘îden müvekkilem mezbûrun mezkûr Dimitri’de olan yetmiş iki bin akçe zimmetine takâs ol dahi mukâsa ve kabûl eyledi, ba‘de’l-yevm menzil-i mezbûr mezkûr Dimitri’nin mülk-i müşterâsıdır, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ-vaka‘a bi’t-taleb ketb olundu. Fi’l-yevmi’l-âşir min-Saferi’l-hayr li-sene mi’e elf Şuhûdü’l-hâl: Süleyman Efendi b. Abdullah, Hüseyin Efendi el-müezzin, İbrahim Ağa b. Abdullah, İbrahim Bey b. Mustafa, Senayot v. Yani, Toroş v. Tanaş, Tomas v. Yani, Kostanti v. Yani, Pakoni v. Nikola, Dimo v. Todoraki, Yorgi v. Yani, Tanaş v. Yani, Dimitri v. Duka.