İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 202 Hüküm no: 229 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar el-Hâc Mesud ve el-Hâc Salih’e olan borçları için hapsedilmiş olan Sefer v. Kirkor’un iflasına karar verilmesi Tüccârdan hâzır bi’l-meclis el-Hâc Mesud nâm kimesneye karz-ı şer‘îden on sekiz guruş ve gāib ani’l-meclis el-Hâc Salih’e on üç guruş deyn için yüz bir gün sicn-i sultânîde mahbûs olan Sefer v. Kirkor’un ber-vech-i âtî istişhâd-ı şer‘î sudûrundan sonra mahmiye-i İstanbul’da Kızılmaslak kurbünde sâkin Ahmed b. el-Hâc Hüseyin ve Hüseyin b. Abdullah ve Receb b. Mehmed nâm kimesneler meclis-i şer‘a hâzırûn olup isre’l-istişhâd fi’l-vâki‘ işbu mezkûr Sefer müflis ve mu‘dim olup hâlâ üzerinde lâbis olduğu köhne libâsından gayrı ism-i mâl ıtlâk olunur bir şey’i olmadığı ma‘lûmumuz olmağla [vü]s‘at-i hâl ve kudret-i mâla vusûlüne değin sebîlî tahliye ve hapisden [ıtlâk] olunması lâzım idüğüne biz şâhidleriz şehâdet dahi ederiz deyü edâ-yı şehâdet-i şer‘iyye eylediklerinde mezbûr el-Hâc Salih’in, yesârına beyyinesi olmamağla hâkim-i muvakkı‘-ı sadr-ı kitâb tûbâ-lehû ve hüsnü me’âb hazretleri dahi ba‘de’t-ta‘dîl ve’t-tezkiye şehâdetleri kabûl ve mûcebiyle mezbûrun iflâsına hükm ve kazâ olunup sâdır olan fermân-ı şerîf-i celîlü’ş-şân üzere işbu vesîka tahrîr ve Vâlide Hanı’nda sâkin Efendil v. Ohan mezbûrun nefsine ve hîn-i mutâlebede meclis-i şer‘a ihzârına kefîl olmağın yed-i tâlibe i‘tâ olundu. Fî evâsıtı Saferi’l-hayr li-sene mi’e ve elf. Şuhûdü’l-hâl: İsmail Efendi b. Receb imâm, Ali Çavuş el-mübâşir, İbrahim Çelebi b. Ahmed, Ebûbekir b. Hüseyin, Ali b. Bâli, Ali b. Yusuf.