İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 203 Hüküm no: 230 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın eşi Mustafa Çelebi b. Hasan’da olan mehir haricindeki alacaklarından hibe suretiyle vazgeçmesi Mahmiye-i İstanbul’da Mustafa Bey mahallesinde sâkine olup hâlâ Matbah-ı âmire emîni Mustafa Efendi’nin mu‘takası olan Âişe bt. Abdullah nâm hatun tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Müezzin Salih Çelebi b. Mustafa ve Mustafa Bey b. Ali şehâdetleriyle şer‘an sâbit olan İmam Ahmed Efendi b. Mehmed meclis-i şer‘-i şerîf-i enverde müvekkile-i mezbûrenin zevci işbu bâ‘isü’l-kitâb Mustafa Çelebi b. Hasan mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Âişe Hatun zevci mezbûr Mustafa Çelebi’nin zimmetinde mütekarrir ve ma‘kūdün-aleyh olan dört bin akçe mehr-i müeccelinin üç bin akçesini mezbûra bey‘-i kat‘î ile bey‘ ü teslîm eylediği on ayaklı bir çift la‘l küpe ve on üç miskāl altın bilezik ve bir sîm ön kuşağı, dört çift Bursa yasdığı ve bir orta Selanik keçesi ve beş minder ve iki döşek ve sekiz yemeni yorgan ve dört hatâyî kaftan ve altı tencere ve altı sahan ve üç sini ve bir güğüm bahâsından kezâlik hakkı olan on yedi bin akçesini ve cihet-i karz-ı şer‘îden mezbûr Mustafa Çelebi’nin zimmetinde hakkı olan bin akçe sekiz bin maksûs parası ki min haysü’l-mecmû‘ zevci merkūm Mustafa Çelebi’nin zimmetinde cihet-i mezbûreden hakkı olan kırk dört bin akçeyi hibetü’d-deyn fe-men aleyhi’d-deyn-i sahîha fehvâsınca zevci merkūm Mustafa Çelebi safka-i vâhide ile hibe-i sahîha-i şer‘iyye ile hibe ve temlîk ol dahi meclis-i hibede ittihâb ve kabûl etdiğinden sonra mehr-i müeccelinden bâkī kalan bin akçeden mâ‘adâ husûs-ı mezbûre müte‘allika âmme-i da‘vâdan mezbûr Mustafa Çelebi’nin zimmetini ibrâ-i âm ile ibrâ vü ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’t-taleb ketb olundu. Fi’l-yevmi’s-sâdis min-Saferi’l-hayr li-sene mi’e ve elf. Şuhûdü’l-hâl: Mustafa Bey b. Ramazan, Mehmed Çelebi b. Mustafa, İbrahim Çelebi b. Hüseyin, Mehmed Efendi Hattât, İbrahim Beşe b. Hüseyin, Bakkal Ahmed Beşe b. ( ), Mustafa Ağa b. Ali, Salih Çelebi b. Mustafa.