İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 217 Hüküm no: 251 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif Çelebi b. Ali’nin Haticesultan mahallesindeki arsasını büyük vâlidesi Ayşe bt. Ahmed’e satması Mahmiye-i İstanbul’da Hadice Sultan mahallesi sâkinlerinden Abdüllatif Çelebi b. Ali nâm kimesne meclis-i şer‘-i şerîf-i enver ve mahfil-i dîn-i münîf-i ezherde büyük vâlidesi bâ‘iset-i hâze’l-kitâb Âişe bt. Ahmed nâm hatun tarafından husûs-ı âti’l-beyâna vekîl-i müsecceli olan el-Hâc Ali b. el-Hâc Kasım nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Ahmed Çelebi tasarrufunda olan vakıf menzil ve bir tarafdan Râbia Hatun Mescid-i şerîfi ve bir tarafdan Âişe Hatun Vakfı olan menzil ve bir tarafdan Medîne-i Münevvere Vakfı olup benim tasarrufumda olan menzil ile mahdûd tûlen otuz zirâ‘ ve arzan sekiz zirâ‘ bi-hesâb-ı şatrancî iki yüz kırk zirâ‘ arsa-i hâliyemi cümle tevâbi‘ ve levâhıkı ve kâffe-i hukūk ve merâfıkı ile müvekkile-i mezbûre büyük vâlidem Âişe Hâtûn’a tarefeynden îcab ve kabûlü hâvî bey‘-i bâtt-ı sahîh-i şer‘î ile altı bin akçeye bey‘ ve temlîk ol dahi ber-vech-i muharrer iştirâ ve temellük ve kabz u kabûl etdiğinden sonra semeni olan meblağ-ı mezbûr altı bin akçeye müte‘allika âmme-i da‘vâdan müvekkile-i mezbûre büyük vâlidemin zimmetini ibrâ-i âmm-ı kātı‘u’n-nizâ‘la ibrâ vü ıskāt eyledim, ba‘de’l-yevm arsa-i mahdûd-ı mezkûr müvekkile-i mezbûre büyük vâlidemin mülk-i müşterâsı olmuşdur keyfe mâ yeşâ’ ve tahtâr mutasarrıfe olsun dedikde, gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Saferi’l-hayr li-sene mi’e ve elf. Şuhûdü’l-hâl: Ali Efendi b. Mustafa, Hüseyin Ağa b. Mustafa, el-Hâc Mustafa b. Tevekkül, Ali Çelebi b. Bâli, Siyavuş b. Abdülkerim.