İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 216 Hüküm no: 250 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Abdullah’ın, vefât eden varisi Çerkes Mehmed b. Abdullah’dan kendisine intikal eden para ve eşyaları Mustafa Efendi’den teslim alması Mahmiye-i İstanbul’da Manisalı Çelebi mahallesi sükkânından olup sâbıkā Kethudâyeri kâtibi olan Mustafa Efendi Kerestelik? hizmetinde iken bundan akdem fevt olan Çerkes Mehmed b. Abdullah’ın li-ebeveyn karındaşı oğlu ve hasran vârisi olduğu lede’ş-şer‘i’l-enver sâbit ve mütehakkık olan Hasan b. Abdullah meclis-i şer‘-i şerîf-i enverde tereke-i müteveffâ-yı mezbûra vâzı‘atü’l-yed olan mezkûr Mustafa Efendi’nin tarafından husûs-ı âti’l-beyâna vekîl olup el-Hâc Mehmed b. Mahmud ve Ebûbekir Çelebi b. Mehmed şehâdetleriyle şer‘an vekâleti sâbit olan el-Hâc Mustafa b. Veliyyüddin mahzarında ikrâr ve takrîr-i kelâm edip mevrûsum müteveffâ-yı mezbûrun mecmû‘-ı terekesi bir sîm kılıç ve bir köhne başlık ma‘a tabku ve bir köhne kırmızı meşin kaftan ve bir meşin alaca kaftan ve iki köhne çakşır ve bir benefş kontuş ve bir yeşil hilâlî kaftan ve iki beyaz sâde ve iki sarık ve bir nîm sarık ve bir alaca zıbun ve bir sagīr çakşır ve bir köhne kuşak ve üç kavuk ve iki câmedân ve dört köhne boğça ve iki müsta‘mel kapama ve bir müsta‘mel zıbun ve kırk dört guruş ve bir sülüs guruş olup eşyâ-yı mezkûre bi’l-irsi’ş-şer‘î bana isâbet etmiş idi. El-hâletü hâzihî eşyâ-yı mezkûre ve meblağ-ı mezbûru mezkûr Mustafa Efendi yedinden bi’t-tamâm ve’l-kemâl ahz u kabz ve tesellüm, ba‘de’l-yevm tereke-i müteveffâ-yı mezbûra müte‘allika vechen mine’l-vücûh da‘vâ ve nizâ‘ım olmayıp husûs-ı mezbûra müte‘allika âmme-i da‘vadan mezbûru ibrâ ve ıskāt eyledim dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferi’l-hayr li-sene mi’e ve elf. [Şuhûdü’l-hâl:] Keçeci el-Hâc Mehmed Çelebi b. Mahmud, Kehhâl Zülfü Mehmed Çelebi b. el-Hâc Mehmed, Müezzin el-Hâc Mehmed, Ömer Çavuş, el-Hâc İbrahim b. Ahmed, Halil Çelebi b. İbrahim, İbrahim b. Yusuf Efendi, Abdülgani Çelebi b. Mehmed.