İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 218 Hüküm no: 253 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma bt. Ali’nin eşi Sadık Çelebi b. Yusuf’dan muhalaa yoluyla boşanması Mahmiye-i İstanbul’da Dülgeroğlu mahallesi sâkinelerinden Fâtıma bt. Ali nâm hatun ba‘de’t-ta‘rîfi’ş-şer‘î meclis-i şer‘-i şerîf-i enverde zevc-i dâhili bâ‘is-i hâze’l-kitâb Sadık Çelebi b. Yusuf nâm kimesne mahzarında ikrâr ve takrîr-i kelâm edip mezbûr Sadık Çelebi zevcim olup beynimizde hüsn-i zindegânemiz olmamağla zimmetinde mütekarrir ve ma‘kūdün-aleyh olan üç bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr Sadık Çelebi ile muhâla‘a-i sahîha-i şer‘iyye ile muhala‘a edip ol dahi hul‘-ı mezbûru kabûl etdikden sonra hukuk-ı zeviyyete [müte‘allika] âmme-i da‘vadan her birimiz âharın zimmetini ibrâ-i âmm-ı râfi‘ü’l-hisâm ile ibrâ ve ıskāt eyledik dedikde mâ-hüve’l-vâkı‘ bi’t-taleb ve’l-ibtigā ketb olundu. Fi’l-yevmi’s-sâmin aşer min-Saferi’l-hayr li-sene mi’e ve elf. [Şuhûdü’l-hâl:] İbrahim Çelebi b. Ahmed ve Ali b. Bâli ve el-Hâc Kerim b. Abdullah, Abdüllatif b. el-imâm, Mehmed b. Osman, Ali Çelebi b. Mustafa, Mehmed b. Ahmed.