İstanbul Mahkemesi 20 Numaralı Sicil (H. 1099-1100 / M. 1688-1689) cilt: 56, sayfa: 219 Hüküm no: 254 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif Çelebi b. Ali’nin, vefât eden dedesi Hacı Osman Çelebi’den kendisine intikal eden menzil hissesini büyük vâlidesi Ayşe bt. Ahmed’e satması Mahmiye-i İstanbul’da Hadice Sultan mahallesinde sâkin iken bundan akdem vefât eden Hacı Osman Çelebi b. Ahmed’in verâseti zevce-i metrûkesi Âişe bt. Ahmed nâm hatun ile kızı oğlu Abdüllatif Çelebi b. Ali’ye münhasıra olduğu şer‘an zâhir ve mütehakkık oldukdan sonra mezbûr Abdüllatif Çelebi meclis-i şer‘-i enverde büyük vâlidesi bâ‘isetü hâze’l-kitâb mezbûre Âişe tarafından husûs-ı âti’l-beyâna vekîl-i müsecceli olan el-Hâc Ali b. el-Hâc Kasım nâm kimesne mahzarında ikrâr ve takrîr-i kelâm edip mûrisimiz müteveffâ-yı mezbûrdan bize irs ile intikāl eden Medîne-i Hazret-i Ebî Eyyûb Ensârî mahallâtından Davud Ağa mahallesinde vâki‘ bir tarafdan Medîne-i Münevvere Vakfı ve bir tarafdan Solakzâde tasarrufunda olan menzil ve bir tarafdan Solakzâde tasarrufunda olan menzil ve bir tarafdan İbrahim Ağazâde Mustafa Ağa çayırı ve ba‘zen yine Medîne-i Münevvere Vakfı olup Âişe Hatun tasarrufunda olan menzil ve bir tarafdan tarik-i âm ile mahdûd fevkānî bir bâb oda ve tahtânî bir bâb oda ve bir sofa ve bir sundurma ve bir kenîf ve zât-ı eşcâr-ı müsmire ve gayr-ı müsmire bağçeyi müştemil mülk menzilde olan sekiz sehimden yedi sehm hisse-i şâyi‘amı cümle tevâbi‘ ve levâhıkı ve kâffe-i hukūk ve merâfıkı ile müvekkile-i mezbûre büyük vâlidem Âişe Hâtûn’a tarafeynden îcâb ve kabûlü hâvî bey‘-i bâtt-ı sahîh-i şer‘î ile beş bin akçeye bey‘ ve temlîk ol dahi ber-vech-i muharrer iştirâ ve temellük ve kabz u kabûl etdikden sonra semeni olan meblağ-ı mezbûr beş bin akçeye müte‘allika âmme-i da‘vâdan müvekkile-i mezkûre büyük vâlidemin zimmetini ibrâ-i âmm-ı kātı‘u’n-nizâ‘la ibrâ vü ıskāt eyledim ve ba‘de’l-yevm menzil-i mahdûd-ı mezkûrun cümlesi müvekkile-i mezbûre büyük vâlidemin mülk ve hakkıdır keyfe mâ teşâ ve tahtâr mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Saferi’l-hayr li-sene mi’e ve elf. Şuhûdü’l-hâl: Ali Efendi b. Mustafa, Hüseyin Ağa b. Mustafa, el-Hâc Mustafa b. Tevekkül, İbrahim Çelebi, Ali Beşe b. Bâli.